Хитайниң росийәни қоллиши хәлқарада зор ғулғула қозғимақта

Мухбиримиз әзиз
2022-03-01
Share

Росийә армийәсиниң украинаға таҗавуз қилиши хәлқараниң күчлүк әйиблишигә дуч келиватқанда, хитай һөкүмитиниң түрлүк шәкилләр арқилиқ бу йолсизлиқни қоллап-қуввәтлиши йәнә бир мәйдан зор ғулғулиға сәвәб болушқа башлиди.

CNN Агентлиқиниң 1-марттики хәвиридә ейтилишичә, украина тәвәсидә тиҗарәт, хизмәт яки оқуш сәвәблири билән туруватқан алтә миңчә хитай пуқраси пути көйгән тохудәк типирлап қалмақта икән. Хәвәрдә ейтилишичә, хитай һөкүмити уруш отиға петип қалған украинадики хитай пуқралириға “йолларниң бихәтәрлики әмәлгә ашқучә бихәтәр орунда сақлап туруш” ни буйруған. Йигирмә нәччә йилдин бери украинада туриватқан хитай пуқраси сун гуаң бу һәқтә мухбирларға сөз қилип “һазир хитайчә чирайниң өзи бу җайда росийәни қоллиғучи, дегән мәнани бериду. Шуңа украина һазир хитайлар үчүн бәк хәтәрлик бир җай болуп қалди” дегән.

“нәзәр вақти” гезитиниң 1-марттики обзор мақалисида болса росийәниң пүтүн дуняға дүшмән болуп қелишидәк реаллиқ нөвәттә “хитай һөкүмитини бәзи назук шәкилләр арқилиқ бу қайнамға кирип қелиштин сақлинишқа үндимәктә” дәп тәсвирләнгән. Улар буниңға мисал қатарида хитай пул-муамилә системисиниң росийә иқтисадий саһәсидин өзлирини тартиватқанлиқини вә бейҗиң даирилириниң москва билән болған алақида еһтиятчанлиқ билән иш көрүватқанлиқини тилға алған. Обзорда ейтилишичә, навада хитайниң росийәни қоллиши давам қиливәрсә хитайниң ғәрп базири вә америка доллири мәркәз қилинған хәлқара пул-муамилә системисидики орни еғир чәклимигә учраш еһтимали бар икән. Бу нуқтини хитай һөкүмитиму наһайити яхши чүшинидикән. Хитай ташқи ишлар министирликиниң баянатчиси ваң венбин бу һәқтә мухбирларға сөз қилип “хитай билән росийә истратегийәлик шерикләрдур. Улар һәргизму иттипақдаш әмәс” дегән.

Хитай һөкүмитиниң росийә һөкүмитини бәк қаттиқму әйиблимәслик, бәк күчлүк шәкилдиму қоллап кәтмәсликтәк муамилигә йөткилишини бәзиләр хәлқараниң украинаға бивастә һәрбий ярдәм беришни башливәткәнлики биләнму мунасивәтлик, дәп қаримақта икән. Болупму америка президенти җов байденниң 350 милйон америка доллирилиқ иккинчи түркүм һәрбий қораллар ярдимигә имза қоюши, явропа иттипақиниң украинани 500 милйон америка доллирилиқ һәрбий қорал билән тәмин етиши, әнглйә, франсийә, канада, германийә, голландийә қатарлиқ он нәччә явропа дөлитиниң бивастә һәрбий ярдәм беришни башливәткәнлики хитай һөкүмитиниң қилмишлири билән рошән селиштурма һасил қилмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт