Amérika xitayning rusiyening jazadin qéchishigha yardem qilsa duch kélidighan aqiwitini agahlandurdi

Muxbirimiz erkin
2022-03-14
Share

Amérika dölet xewpsizlik meslihetchisi jek solliwan, eger xitay rusiyening ukra'inagha qoralliq tajawuz qilishigha qarita yürgüzülgen jazalash tedbirliridin qéchishigha yardem qilsa, “Muqerrer” aqiwetke duch kélidighanliqini agahlandurghan. Roytérs agéntliqining xewer qilishiche, birqanche amérika emeldari rusiyening 24-féwral ukra'inagha tajawuz qilghandin kéyin xitaydin qoral-yaragh yardem qilishni sorighanliqi, bu, aqsarayning xitay gherbning ukra'inagha yardem qilip, uning özini mudapi'e qilishigha yardem bérish tirishchanliqigha buzghunchiliq qilishi mumkin, dégen endishisini qozghighanliqini bildürgen.

Jek solliwan 13-mart amérika xewerler tori-CNN ning ziyaritining qobul qilghanda xitayning rusiyeni iqtisadiy we maddiy jehettin qanchilik rewishte qollawatqanliqini yéqindin közitiwatqanliqi, eger bundaq ish yüz berse, buning éghir aqiwet keltürüp chiqiridighanliqini éytqan. Jek solliwan mundaq dégen: “Biz béyjing bilen biwasite we xususi rewishte alaqilishiwatimiz. Eger keng kölemlik jazadin qéchish herikiti bolsa yaki xitay rusiyening bu boshluqni toldurushigha yardem qilsa buning bir aqiwiti bolidighanliqi muqerrer”. Jek solliwan yene: “Biz dunyaning herqandaq jayidiki herqandaq dölettin rusiyening bu iqtisadiy jazadin qutulushi üchün hayatliq yoligha érishishige yol qoymaymiz” dégen.

Jek solliwan bu sözlerni 14-mart küni xitayning tashqi ishlargha mes'ul siyasiy byuro ezasi yang jyéchi bilen italiye paytexti rimda uchrishishtin bir kün awwal éytqan.

Rusiyening xitaydin qoral-yaragh yardem qilishni telep qilghanliqini tunji qétim “Maliye waqti” géziti xewer qilghan. Lékin roytérs agéntliqining éytishiche, xitayning washin'gtonda turushluq elchixanisining bayanatchisi “Özining bundaq bir xewerni anglap baqmighanliqi” ni bildürgen. Jek solliwanning éytishiche, washin'gton xitayning rusiyening ukra'inagha qaritilghan pilanidin xewerdar ikenlikige ishinidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet