Amérika hökümiti rusiyege oghriliqche yardem bériwatqan xitaygha cheklime siziqi békitken

Muxbirimiz jewlan
2022-03-25
Share

Amérika hökümiti rusiyege yürgüzülgen iqtisadiy imbargodin halqip ötüp, rusiyege pul-mu'amile, maddiy eshya, hetta eskiriy lazimetlikler yardimi bériwatqan, iqtisadiy jazani soda pursitige aylanduruwatqan xitay hökümitige qizil siziq békitken.

Ruytérs agéntliqining xewirige qarighanda, amérika prézidénti jow baydén nato (NATO) gha eza döletler bashliqliri jiddiy yighinigha qatnishp, xitayning qilmishlirigha ortaq tedbir élishni qarar qilidiken. Amérika dölet xepsizliki meslihetchisi jék salliwan (Jake Sullivan) 23-mart küni muxbirlargha qilghan sözide, “7 Dölet guruhi” ezalirining pat arida xitaygha ortaq inkas qayturup, xitay we bashqa her qandaq döletning rusiyege yürgüzülgen imbargogha buzghunchiliq qilmasliqigha kapaletlik qilidighanliqini bildürgen. Jék salliwan mundaq dégen: “Bu peqet xitayghila emes, rusiyege bérilgen iqtisadiy jazagha buzghunchiliq qilishqa yaki uni ajizlitishqa urunidighan her qandaq iqitsadiy gewdige qaritilghan. Amérika hökümiti xitaygha bu signalni berdi, emdiki gep bizning yawropa ittipaqi we bashqa döletler bilen bir yerge kélishimizdur”.

Amérika hökümiti éliktronluq mehsulatlar, kompyutér, ayropilan zapchasliri, yérim ötküzgüch qatarliq muhim mehsulatlarni rusiyege éksport qilishni chekligen bolup, cheklimini buzghan shirketlerni jazlaydighanliqini élan qilghan.

Xitay hökümiti rusiyege yürgüzülgen imbargoni izchil eyiblep kelgen bolup, rusiye iqtisadigha yardem bérish üchün rusiyening bughdaylirini almaqchi bolghan. Amérika hökümiti xitayning rusiyege qaritilghan soda cheklimisini buzup, alliqandaq yochuqtin paydilinip yaki özliri yochuq peyda qilip, rusiyege dawamliq iqtisadiy yardem, hetta herbiy yardem bérishidin ensireydiken. Jék salliwanning bildürüshiche, amérika hökümiti bu ishning yüz bermeslikige kapaletlik qilish üchün bu qétim xitayning qilmishigha éniq chek békitken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet