Хитай дөләт мудапиә министири хитайниң йәршари бихәтәрликини қоғдашта русийә билән һәмкарлишишни халайдиғанлиқини ейтқан

Мухбиримиз әркин
2023.04.17

Санаәтләшкән 7 дөләт русийәниң украинаға қаратқан қораллиқ һуҗумини җазалашта давамлиқ бирдәк икәнликини җакарлиған бир вақитта, хитай дөләт мудапиә министири ли шаңфу 16-апрел русийә президенти путин билән көрүшүп, хитайниң йәршари бихәтәрликини қоғдашта русийә билән һәмкарлишишни халайдиғанлиқини ейтқан. Хитай дөләт мудапиә министириниң зиярити йеқинда хитай рәиси ши җинпиңниң москвада зиярәттә болуп, русийә президентиға хитай билән русийә бирләшсә, өзлириниң дуняда “йүз йилдин бери көрүлүп бақмиған бир өзгиришкә йетәкчилик қилидиғанлиқи” ни, русийә президентиниңму униңға қошулидиғанлиқини ейтишиниң арқисидин елип берилған.

Мәлум болушичә, ли шаңфу русийә президенти билән көрүшкәндә, униңға ши җинпиң һөкүмитиниң улар ‍өткән ‍айда көрүшкәндә һасил қилған чүшинишни “толуқ иҗра қилидиғанлиқи” ни билдүргән. Лекин ши җинпиң билән путин һасил қилған бир “‍ортақ чүшиниш” ниң немә икәнлики тилға елинмиған. “вашингтон почтиси” гезитиниң 16-апрел бәргән хәвиридә қәйт қилинишичә, ли шаңфуниң москва зияритидә ипадисини тапқан “йолдашлиқ” мунасивити, хитайниң русийәни “әҗәллик қораллар” билән тәминләшкә тәйярлиқ қиливатқан болуши мүмкинликигә даир хәлқаралиқ әндишиләрни техиму күчәйткән. Американиң б д т да турушлуқ баш әлчиси линда томас гренфелд йеқинда хитайни агаһландуруп, әгәр хитай русийәни “һалқилиқ ярдәм” билән тәминлисә, “қизил сизиқ” тин атлап өткән һесаблинидиғанлиқини билдүргәниди.

Мәлум болушичә, ли шаңфу путин билән көрүшкәндә йәнә бейҗиңниң “икки армийә оттурисидики истратегийәлик алақини техиму күчәйтип, көп тәрәплик маслишиш вә һәмкарлиқни алға сүрүп, йәр шари вә район бихәтәрлики һәм муқимлиқини қоғдашқа йеңи төһпә қошушни халайдиғанлиқи” ни ейтқан. Ли шаңфуниң русийә зиярити 4 күн давамлишидиған болуп, бу униң өткән айда хитай дөләт мудапиә министирлиқиға тәйинләнгәндин бериқи тунҗи чәтәл зиярити һесаблиниду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.