Xitay dölet mudapi'e ministiri xitayning yershari bixeterlikini qoghdashta rusiye bilen hemkarlishishni xalaydighanliqini éytqan

Sana'etleshken 7 dölet rusiyening ukra'inagha qaratqan qoralliq hujumini jazalashta dawamliq birdek ikenlikini jakarlighan bir waqitta, xitay dölet mudapi'e ministiri li shangfu 16-aprél rusiye prézidénti putin bilen körüshüp, xitayning yershari bixeterlikini qoghdashta rusiye bilen hemkarlishishni xalaydighanliqini éytqan. Xitay dölet mudapi'e ministirining ziyariti yéqinda xitay re'isi shi jinpingning moskwada ziyarette bolup, rusiye prézidéntigha xitay bilen rusiye birleshse, özlirining dunyada “Yüz yildin béri körülüp baqmighan bir özgirishke yétekchilik qilidighanliqi” ni, rusiye prézidéntiningmu uninggha qoshulidighanliqini éytishining arqisidin élip bérilghan.

Melum bolushiche, li shangfu rusiye prézidénti bilen körüshkende, uninggha shi jinping hökümitining ular ‍ötken ‍ayda körüshkende hasil qilghan chüshinishni “Toluq ijra qilidighanliqi” ni bildürgen. Lékin shi jinping bilen putin hasil qilghan bir “‍Ortaq chüshinish” ning néme ikenliki tilgha élinmighan. “Washin'gton pochtisi” gézitining 16-aprél bergen xewiride qeyt qilinishiche, li shangfuning moskwa ziyaritide ipadisini tapqan “Yoldashliq” munasiwiti, xitayning rusiyeni “Ejellik qorallar” bilen teminleshke teyyarliq qiliwatqan bolushi mümkinlikige da'ir xelq'araliq endishilerni téximu kücheytken. Amérikaning b d t da turushluq bash elchisi linda tomas grénféld yéqinda xitayni agahlandurup, eger xitay rusiyeni “Halqiliq yardem” bilen teminlise, “Qizil siziq” tin atlap ötken hésablinidighanliqini bildürgenidi.

Melum bolushiche, li shangfu putin bilen körüshkende yene béyjingning “Ikki armiye otturisidiki istratégiyelik alaqini téximu kücheytip, köp tereplik maslishish we hemkarliqni algha sürüp, yer shari we rayon bixeterliki hem muqimliqini qoghdashqa yéngi töhpe qoshushni xalaydighanliqi” ni éytqan. Li shangfuning rusiye ziyariti 4 kün dawamlishidighan bolup, bu uning ötken ayda xitay dölet mudapi'e ministirliqigha teyinlen'gendin bériqi tunji chet'el ziyariti hésablinidu.