Xitayning rusiyedin sétiwalghan sabiq sowét ittipaqi déngiz armiyesining awiyamatkisigha ot ketken

Xitayning rusiyedin sétiwélip, shangxey etrapida sayahetchilerning körgezme qilishigha ishlitiwatqan sabiq sowét ittipaqi déngiz armiyesining “Minsk” namliq kona awiyamatkisigha 16-awghust jüme küni ot kétip köyüp ketken. Amérika simliq xewerler tori s n n ning xitay taratquliridin neqil keltürüp bergen xewiride qeyt qilinishiche, “Minsk” namliq bu awiyamatka yéqinqi 8 yildin béri jyangsu ölkisidiki nentongning changjyang deryasi éghizida lengger tashlap toxtitip qoyulghaniken. Xewerlerde, bu awiyamatkining herbiy baghchigha aylandurush üchün yéngilash élip bériwatqanda ot ketkenliki, otning jüme küni chüshtin kéyin tutushup, 24 sa'ettin kéyin aran öchürüwélin'ghanliqi qeyt qilinmaqta. “Minsk” namliq bu awiyamatka xitayning rusiye yaki ukra'inadin sétiwalghan sabiq sowét ittipaqi déngiz armiyesige tewe ikkinchi awiyamatkisi hésablinidu.

Xitay hökümiti burun ukra'inaning sabiq sowét ittipaqidin qalghan “Waryag” namliq awiyamatkisini “Leylime qimarxana” qilish namida sétiwélip, türkiyening istanbul boghuzi arqiliq xitaygha élip kelgendin kéyin, herbiy awiyamatka qilip özgertip, uning ismini “Lyawning” namliq awiyamatkigha özgertkenidi. Yerlik da'iriler ot apitide “Adem ölüsh weqelirining bolmighanliqi, nöwette ot apitining sewebi tekshürülüwatqanliqi” ni éytqan.

S n n ning bildürüshiche, xitay taratqulirida ot apitining bu awiyamatkini herbiy baghchigha aylandurush pilanigha so'al peyda qilghanliqi, bir xitay emeldarining “Ot apiti bu türning istiqbaligha bek köp éniqsizliqlarni élip keldi” dégenliki qeyt qilinmaqtiken. “Minsk” namliq awiyamatka sabiq sowét ittipaqi déngiz armiyesining töt awiyamatkisining biri bolup, 1970-yilidin 1987-yilighiche bolghan ariliqta yasalghanliqi melum. S n n ning bildürüshiche, sabiq sowét ittipaqining tinch okyan flotigha seplep bérilgen bu awiyamatkini, 1991-yili sabiq sowét ittipaqi parchilan'ghandin kéyin rusiye ötküzüwélip 1993-yili satqaniken.