Amérika hökümiti: xitay gherb döletliri yaki rusiyedin birni tallishi kérek

Amérika hökümiti bu hepte peyshenbe küni (16-may)  béyjinggha ziyaretke kelgen rusiye pirézidénti wiladimir putinni dawamliq qollaydighanliqini bildürgen xitay hökümitini eyibligen.

“Heptilik xewerler” torining 16-may küni bu heqte bergen xewiride éytilishiche, amérika tashqi ishlar ministiri bilinkén xitayning nöwette gherb döletlirining yénida yaki rusiyening yénida turushi kéreklikini tekitlep: “Eger xitay yawropa we bashqa döletler bilen yaxshi munasiwitini saqlap qalimen deydiken, yawropaning xewpsizlikige eng chong tehdit séliwatqan rusiyege yardem bermesliki kérek؛ bu amérikaningla meydani bolup qalmastin, yawropa ittipaqi, nato we ‛7 dölet guruhi‚ ning ortaq meydanidur” dégen. 

Putinning bu qétim xitayni ziyaret qilishi, u 5-qétimliq wezipige olturghandin buyan élip barghan tunji dölet ziyariti bolup, ukra'inagha qilghan hujumi 3-yiligha qedem qoyghan, amérika bilen yawropa rusiyege dawamliq émbargo yürgüzüwatqan bir mezgilge toghra kelgen.

 Amérika bayanatchisining bildürüshiche, eger xitay rusiyege yardem bermise, rusiye bu urushta ghayet zor qiyinchiliqlargha yoluqidiken. U mundaq dégen: “Héchqandaq dölet putinning ukra'inagha qilghan tajawuzchiliq hujumigha yardem bermesliki kérek. Biz rusiyening ukra'inagha élip barghan xelq'ara qanun'gha xilap heriketlirige köz yumalmaymiz hemde bu urushqa jawabkar bolghanlardin hésab soraymiz”.

Xewerde körsitilishiche, putinning bu qétim xitayni ziyaret qilishi ikki terep munasiwitining dawamliq chongqurlishidighanliqidin dérek béridiken. Yeni hazir xitay-rusiye rezillik ittipaqi alliqachan shekillen'gen bolup, amérika bilen yawropa  bu ittipaqning “Istratégiyelik hemkarliqi” ni tonup yétip, her ikkisige oxshash jaza qollinishi kérek iken. Bolmisa, ular kelgüside téximu xeterlik küchke aylinidiken.