Xitayning rusiyege yoshurunche herbiy yardem bériwatqanliqi ashkarilandi

Ukra'ina urushi bashlan'ghandin buyan xitay hökümitining izchil türde rusiyeni qollap kéliwatqanliqi heqqide türlük pikirler otturigha chiqqan bolsimu, bu heqte éniq bir delil-ispat körsitilmigenidi. Yéqinda besh burjeklik bina (amérika dölet mudapi'e ministirliqi) ning éhtiyatsizliqtin ashkara bolup ketken bir yürüsh mexpiy höjjetliri xitay hökümitining rusiyeni muhim herbiy yardemler bilen biwasite temin etkenlikini körsitip bergen.

Bu höjjetlerde körsitilishiche, 2023-yili féwraldila amérika hökümiti xitayning yoshurun rewishte rusiyege herbiy yardem bériwatqanliqi heqqidiki ishenchlik uchurlarni qolgha chüshürgen. Bu uchurlarda éytilishiche, xitay hökümiti rusiyedin özliri qiliwatqan yardemlerni qet'iy mexpiy tutushni telep qilghan. Bu höjjetlerning biride rusiye armiyesi urushning deslipide özlirining alahide qisimlirining éghir talapetke uchrighanliqini éytqan. Buninggha misal qatarida 346-alahide qisim birigadisi diki 900 jengchining öz wezipisini ayaghlashturghanda 125 ke chüshüp qalghanliqi tilgha élin'ghan. Emma del shu féwral mezgilide xitayning sabiq tashqi ishlar ministiri chin gang “Dölitimiz urush oti ichidiki héchqaysi terepni herbiy qoral-yaragh bilen temin etmeydu. Bu bizning özgermes pirinsipimiz” dep jakarlighan.

Melum bolushiche, 2023-yili martta shi jinping moskwani ziyaret qilghan bolup, bu qétimqi ziyaretning “Ikki terep munasiwitini téximu chongqurlashturush” ikenlikini ashkara tekitligen. Bu qétimqi mexpiy höjjetler bolsa shi jinping tilgha alghan “Chongqurlashturush” ning némidin dérek béridighanliqini téximu éniq körsitip bergen.