Xitayning körünüshte bitereptek qilsimu, emeliyette rusiyeni herbiy qorallar bilen teminlewatqanliqi ilgiri sürüldi

Washin'gtondin muxbirimiz erkin teyyarlidi
2023.08.21

Xitay ukra'ina urushida bitereptek qilsimu, emeliyette uning rusiyeni tik uchar, uchquchisiz ayropilan, optikiliq körüsh durbuni we bashqa halqiliq herbiy xam eshyalar bilen teminlewatqanliqi ilgiri sürüldi. Xitay hökümiti rusiye 2022-yili 2-ayda ukra'inagha qoralliq tajawuz qilghandin béri, izchil özining biterep ikenlikini körsitip, rusiyeni herbiy qoral-yaraghlar bilen teminlep kelgenlikini inkar qilip kelgen. Lékin en'gliye “Télégraf” gézitining tekshürüshidin melum bolushiche, xitay rusiyening herbiy qoral-yaragh karxanilirigha nechche on ming qétimlap mal yötkigen.

 “Télégraf” gézitining tekshürüsh doklatida, xitayning rusiyeni bu lawazimatlar bilen teminlishi, gherbning rusiyege yürgüzgen émbargosigha buzghunchiliq qilghan bolushi mumkinliki tekitlenmekte. Doklatta qeyt qilinishiche, xitay bilen rusiye arisidiki soda bu yilning deslepki 8 éyida 200 milyard dollardin éship, yéngi rékort yaratqan.

 Doklatta, xitayning rusiyege qaratqan yardimi ukra'ina urushidin burunla bashlan'ghanliqi, xitayning “Shento xongxu pilastik” namliq oyunchuqlarni top sétish shirkitining rusiye ukra'inagha qoralliq tajawuz qilishtin ikki ay awwal rusiyening bir shirkitige ming dane uchquchisiz ayropilan (dron) satqanliqi, urush partlighandin kéyin, xitayning yardimi téximu köpeygenlikini bildürgen.

 “Télégraf” gézitining éytishiche, xitayning Hems999 namliq tik uchar ishlepchiqirish shirkiti bilen tyenjin xu'arong awiyatsiye shirkiti rusiyege tik uchar ayropilani yollighan.

Doklatta yene 50 tin artuq rusiye shirkitining xitay optikiliq körüsh durbunlirini sétiwalghanliqi, eswablarning köp qismining “Yiwu wojyé optikiliq eswablar shirkiti” teripidin “Owchiliq eswabliri” dégen namda sétilghanliqi bildürülgen. Amérika ilgiri xitayni rusiyeni qoral-yaragh bilen teminlimeslik heqqide köp qétim agahlandurup, eger u rusiyeni herbiy qoral-yaragh bilen teminlise, uning éghir bedel töleydighanliqini tekitlep kelgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.