Xitay “Chégradin kirish weqesi” seweblik rusiyeni eyiblidi

Washin'gtondin muxbirimiz erkin teyyarlidi
2023.08.07

 Xitayning moskwada turushluq elchixanisi ötken heptining axiri bayanat élan qilip, rusiye chégra da'irilirining xitay puqralirigha tutqan mu'amilisi seweblik rusiyeni qattiq eyibligen. Chet'el taratqulirining qeyt qilishiche, rusiyening eng asasliq ittipaqdishi bolghan we uning ukra'inagha qoralliq tajawuz qilishini tenqidleshni izchil ret qilip kelgen xitayning chégrada bolghan bir weqe seweblik rusiyeni ashkara tenqid qilishi binormal ehwal iken.

Xitayning moskwada turushluq elchixanisi 4-awghust xitay ijtima'iy taratqu supisi “Ündidar” arqiliq élan qilghan bayanatida, besh neper xitay puqrasining rusiyege kirishining ret qilinishini “Rehimsiz we qanunni chékidin ashurup ijra qilghanliq” dep eyibligen.

 Xitay elchixanisining bayanatida bu weqe xitay puqralirining “Qanunluq hoquqi we menpe'etige jiddiy ziyan salghanliq” bolidighanliqi tekitlen'gen. Bayanatta qeyt qilinishiche, rusiye 29-iyul küni rusiyege kirmekchi bolghan xitay puqralirini chégrada tosup qélip, töt sa'ettek soraq qilghan, shundaqla ularning wizisi bikar qilinip, rusiyege kirishi ret qilin'ghan. Xitayning ukra'ina urushi halqiliq bir peytte turghan nazuk bir waqitta tuyuqsiz rusiyeni eyiblishi, moskwa bilen béyjingning munasiwitige qarita yéngi so'allarni peyda qilmaqta.

 “Siyasiyon” gézitining qeyt qilishiche, béyjing 2022-yili 24-féwral küni rusiye ukra'inagha qoralliq tajawuz qilishtin ikki kün awwal moskwa bilen bolghan “Shérikchilik munasiwitining cheksiz” ikenlikini jakarlighan. Kirimél sariyining bir qanche asasliq ittipaqdishi rusiye pirézidénti putinning tajawuzchiliq herikitini eyibleshni izchil ret qilip kéliwatqan bolup, xitay shularning biri, dep qaralmaqta.

 Xitayning ötken heptining axiri se'udi erebistanning sahibxanliqida ötküzülgen 40 tek döletning ukra'ina tinchliq yighini harpisida rusiyeni eyiblishi diqqet qozghidi. Melum bolushiche, bu qétimqi yighin'gha xitay qatnashqan bolsimu, emma rusiye teklip qilinmighan. “Siyasiyon” gézitining éytishiche, ukra'ina hökümiti yighin qatnashquchilirining ukra'ina urushigha xatime bérish yolidiki herqandaq tinchliq kélishimi ukra'inaning zémin pütünlüki we b d t nizamnamisini asas qilishqa qoshulghanliqini éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.