Уйғур районида вәзипә өтәветип ухлап қалған хитай сақчилириниң сүрәтлири диққәт қозғиди

Бүгүн хитайчә көзитиш намлиқ бир хәвәр торида хитай сақчилириниң уйғур районида вәзипә өтәватқан мәзгилдә ухлаватқан сүрәтлири елан қилинди.

Әсли хәвәрдә хитай сақчилириниң җапалиқ турмушиға мәдһийә оқулған болсиму, әмма сүрәтләрдин ипадиләнгән сақчиларниң мәсулийәтсиз позитсийиси вә пассип кәйпияти хәвәрни көргүчи вә көзәткүчиләрниң диққитини тартти.

Сүрәттә тамға йөлүнүп ухлаватқан 10 нәччә сақчиниң қолида “топилаңға қарши туруш” дәп хәт йезилған қалқанлар тутулған, коча оттурисида топлишип йәрдә ятқан сақчиларниң үсти-беши толиму аварә қияпәттә болуп, буниңға қарита бәзи көрүрмәнләр һесдашлиқ позитсийиси билдүргән; йәнә бәзиләр болса бу көрүнүштә сақчиларға хас сәзгүрлүк вә җәңгиварлиқниң йоқлуқи, бошаңлиқи тәнқид қилған.

Бу сүрәтләр һәққидә пикир баян қилған муһаҗирәттики уйғур көзәткүчиләрдин учқунҗан әпәнди, сүрәтләргә асасән даириләрниң районда вәзийәт еһтияҗидин артуқ күч қоллиниватқанлиқини илгири сүрди. У йәнә хитай әмәлдарлириниң райондики йеқинқи вәқәләрдин чөчүп кәткәнликини вә өз бихәтәрликини капаләт астиға елиш үчүн, көп санда сақчиларни 24 саәт нөвәттә турушқа қистиғанлиқини әскәртти.