Xitayning chet ellerdiki saqchi ponkitlirini tekshürüsh bashlandi
2022.11.07
Puqrawiy teshkilatlardin bolghan “Muhapizetchilerni qoghdash” teshkilati uzun mezgillik tekshürüshtin kéyin, 2022-yili séntebirde xitay hökümitining chet ellerdiki 110 saqchi ponkiti hemde ularning xitay hökümiti ijra qiliwatqan chégra halqighan basturushlarni ishqa ashurushtiki roli sherhiylen'gen doklatni élan qilghan idi. 7-Noyabirgha qeder amérika, en'gliye, gérmaniye, kanada, awstriye, italiye, érlandiye qatarliq 14 dölet özlirining bu mesilini tekshüriwatqanliqini bildürgen.
Mezkur teshkilatning tor bétide 7-noyabir küni élan qilin'ghan bu heqtiki bayanatta körsitilishiche, bu saqchi ponkitliri xitay jama'et xewpsizlik tarmaqliri we “Birliksep bölüm”lirining zich hemkarliqida barliqqa kelgen bolup, ularning asasliq wezipisi chet ellerde xitay hökümitige qarshi otturigha chiqqan pa'aliyetlerni ujuqturush, shuningdek chet ellerdiki xitay puqrasi bolghan kishilerni qanunsiz yosunda xitaygha ötküzüp bérish xizmitige maslishish iken.
“Muhapizetchilerni qoghdash” teshkilatining bu doklati élan qilin'ghandin kéyin, herqaysi döletler arqimu-arqidin herketke ötken hemde özlirining xewiri bolmighan ehwalda qurulghan bu mu'esseselerning pa'aliyetlirini tekshürüshke bashlighan. Emma bu xil saqchi ponkitliri qurulghan bir qisim döletler, bolupmu xitay bilen qoyuq iqtisadiy alaqisi bolghan döletler bu heqte inkas bildürüshni ret qilghan.