Коммунист хитайниң ғәрб әмәлдарлириға қаратқан “пул вә сәтәңләр һийлиси” давамлашмақта

Вашингтондин мухбиримиз җәвлан тәйярлиди
2023.09.11

Әнглийә “муһапизәтчи” ториниң 10-сентәбир күни елан қилған хәвиридә ейтилишичә, әнглийәдә коммунист хитайниң җасуси дәп гуман қилинған бир шәхс қолға елинған, у әнглийә парламентидики консерватиплар билән алақиси болған бир тәтқиқатчи икән. Бу вәқәдин парламент әзалири һәйран қалған.

 Америка “қуяш” тори бу һәқтә бәргән мақалисидә, “бу қетим тутулған хитай җасуси гумандари пәқәт миңниң ичидики бири” дейилгән вә 2018-йилдин буян хитай җасуслириниң америка вә әнглийәдә паал һәрикәт қилғанлиқи баян қилинған; буниңға мисал сүпитидә, фаң фаң исимлик бир хитай сәтәңниң америка әмәлдарлири билән чатиқи барлиқиниң ашкариланғанлиқи, хитай җасуси шү йәнҗүнниң америкада сода мәхпийәтликини оғрилиғанлиқи үчүн америка соти тәрипидин 20 йиллиқ қамаққа һөкүм қилинғанлиқи көрситилгән.

Мақалидә ейтилишичә, әнглийәдики бу җасус гумандариниң тутулуши әмәлийәттә хитайниң йәнила “пул вә сәтәңләр һийлиси” дин пайдилинип ғәрб әмәлдарлирини қилтаққа дәсситиватқанлиқини көрситип бәргән. Хитай йәнә әнглийәниң һәр қайси җайлирида мәхпий сақчи понкитлири қуруп, җасуслирини қоювәткән. Хитай җасуслири тәсири бар сиясәтчиләрнила әмәс, уларниң ярдәмчилири, хизмәтчи хадимлар, пирактикантларниму “овлаш” нишани қилидикән.

 “хитай сәтәңлири” линкден (Linkedin) , фейсбок қатарлиқ иҗтимаий алақә васитилиридин пайдилинип, америка яки әнглийә әмәлдарлирини “овлайдикән” ; уларни кәлтүрүвалса, хитай үчүн қиммити болған мәхпий учурларни оғрилайдикән.

Әнглийә баш министири риши сунак (Rishi Sunak) бу қетим “20 дөләт башлиқлири йиғини” да хитай баш министири ли чияң билән сөһбәтләшкәндә, хитайниң әнглийә парламентиға арилишиш қилмишлирини оттуриға қойидиғанлиқини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.