Kommunist xitayning gherb emeldarlirigha qaratqan “Pul we setengler hiylisi” dawamlashmaqta

En'gliye “Muhapizetchi” torining 10-séntebir küni élan qilghan xewiride éytilishiche, en'gliyede kommunist xitayning jasusi dep guman qilin'ghan bir shexs qolgha élin'ghan, u en'gliye parlaméntidiki konsérwatiplar bilen alaqisi bolghan bir tetqiqatchi iken. Bu weqedin parlamént ezaliri heyran qalghan.

 Amérika “Quyash” tori bu heqte bergen maqaliside, “Bu qétim tutulghan xitay jasusi gumandari peqet mingning ichidiki biri” déyilgen we 2018-yildin buyan xitay jasuslirining amérika we en'gliyede pa'al heriket qilghanliqi bayan qilin'ghan؛ buninggha misal süpitide, fang fang isimlik bir xitay setengning amérika emeldarliri bilen chatiqi barliqining ashkarilan'ghanliqi, xitay jasusi shü yenjünning amérikada soda mexpiyetlikini oghrilighanliqi üchün amérika soti teripidin 20 yilliq qamaqqa höküm qilin'ghanliqi körsitilgen.

Maqalide éytilishiche, en'gliyediki bu jasus gumandarining tutulushi emeliyette xitayning yenila “Pul we setengler hiylisi” din paydilinip gherb emeldarlirini qiltaqqa dessitiwatqanliqini körsitip bergen. Xitay yene en'gliyening her qaysi jaylirida mexpiy saqchi ponkitliri qurup, jasuslirini qoyuwetken. Xitay jasusliri tesiri bar siyasetchilernila emes, ularning yardemchiliri, xizmetchi xadimlar, piraktikantlarnimu “Owlash” nishani qilidiken.

 “Xitay setengliri” linkdén (Linkedin) , féysbok qatarliq ijtima'iy alaqe wasitiliridin paydilinip, amérika yaki en'gliye emeldarlirini “Owlaydiken” ؛ ularni keltürüwalsa, xitay üchün qimmiti bolghan mexpiy uchurlarni oghrilaydiken.

En'gliye bash ministiri rishi sunak (Rishi Sunak) bu qétim “20 Dölet bashliqliri yighini” da xitay bash ministiri li chiyang bilen söhbetleshkende, xitayning en'gliye parlaméntigha arilishish qilmishlirini otturigha qoyidighanliqini bildürgen.