Хитай ширкәтлири оттура асия дөләтлиридә көпләп мал амбири қурушқа башлиған

Вашингтондин мухбиримиз уйғар тәйярлиди
2023.11.30

“тәңритағ тори” ниң 2023-йили 11-айниң 29 күнидики хәвиридә дейилишичә, өткән бир айда үрүмчи хәлқара қуруқлуқ порт райони хитай карханилириниң қошна әлләрдә амбар қуруватқанлиқини илгири сүргән. Шинҗаң “силутоң” учур техника чәклик ширкитиниң чәт әлдики амбири қазақистанда қурулған болуп, бу амбар үрүмчи әркин сода райони қурулғандин кейин хитай ширкәтлириниң чәт әлдә қурған тунҗи амбири икән.

Хитай ширкәтлириниң қошна әлләрдики амбарлири заказ мал йәткүзүш иқтидарини юқири көтүрүш үчүн қурулған. Бу амбарларниң чәт әлдә мал сақлаш, оборот вә пишшиқлап ишләш қатарлиқ иқтидарлири бар икән. Електиронлуқ сода вә уларниң базар үлүшини кеңәйтиш пурсити яритип беридикән.

Хитай мәнбәлиригә асасланғанда, уйғур елиниң 8-айдики ташқи сода импорт-експорт омумий қиммити 36 милярд 80 милйон йүәнгә йетип, тарихтики әң юқири рекортни яратқан. Алдинқи сәккиз айда уйғур райониниң експорт қиммити 184 милярд 710 милйон йүәнгә йетип, охшаш мәзгилдикидин 53.5 Пирсәнт ашқан.

Америкадики коммунизм қурбанлири хатирә фондиниң алий тәтқиқатчиси адриан зенз уйғур елидики експортниң рекорт характерлик юқири сүрәттә көпийишиниң бир муһим сәвәблиридин бири, дәл уйғур райониниң қошна оттура асия дөләтлири билән болған содисидики җиддий тәрәққиятқа мунасивәтлик, дәп чүшәндүргән. У, “хитай һөкүмити ғәрб дөләтлири йүргүзүватқан сода ембарголири сәвәбидин келип чиққан зиянлирини қошна дөләтләргә һәссиләп көпәйтиватқан експорти арқилиқ толуқлимақчи” дәп көрсәткән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.