Хитай ширкәтлиридин үчи америка елан қилған қара тизимликкә киргүзүлди

Вашингтондин мухбиримиз әзиз тәйярлиди
2024.06.11

Америка ана вәтән хәвпсизлики министирлиқи 11-июн елан қилған баянатта көрситилишичә, улар хитайдики деңиз мәһсулатлири, алюмин вә аяғ кийимлири ишләпчиқиридиған үч чоң ширкәтни “уйғур мәҗбурий әмгики билән мунасивәтлик” дәп қариғанлиқи үчүн қара тизимликкә алған. Нөвәттә бу һал “уйғур мәҗбурий әмгикиниң алдини елиш қануни” иң иҗра қилинишидики йәнә бир муһим нәтиҗә, дәп қаралмақта.

Баянатта ейтилишичә, бу қетим қара тизимликкә киргүзүлгәнләр айрим-айрим һалда “доңгуән бостанлиқ аяғ кийим ширкити”, “шәндуң мейҗя гуруһи” вә “шинҗаң шенхо көмүр вә електир ширкити” икән. 2024-Йили 12-июндин башлап америка таможна вә чегра қоғдаш идариси (CBP) буларниң һәрқандақ мәһсулатини аптоматик һалда “уйғур мәҗбурий әмгики билән бағлинишлиқ” дәп қарайдикән һәмдә америка таможнисидин өтүшини мәни қилидикән. Вәтән хәвпсизлик министирлиқиниң министири алехандро майоркас (Alejandro N. Mayorkas) Бу һәқтә сөз қилип “биз һәрқандақ шәкилдики мәҗбурий әмгәк мәһсулатиниң америка чеграсидин өтүшигә йол қоялмаймиз. Бу хилдики мәҗбурий әмгәккә четишлиқ ширкәтләрни давамлиқ һалда тәкшүримиз” дегән.

Баянатта ейтилишичә, мәзкур министирлиқ қармиқидики “мәҗбурий әмгәккә қарши туруш хизмәт гурупписи” (FLETF) мәҗбурий әмгәккә бағлинишлиқ ширкәтләрни тәкшүрүшкә мәсул болуп, уйғур дияридики давам қиливатқан қирғинчилиқниң җавабкарлиқини сүрүштә қилиш, шуниңдәк уйғур вә башқа милләтләргә қаритилған “инсанийәткә қарши җинайәтләр” ни чәкләшни хизмәт нишани қилидикән. Мәзкур гуруппиниң рәиси, ана вәтән хәвпсизлики министирлиқиниң министир ярдәмчиси роберт силверс (Robert Silvers) бу мунасивәт билән сөз қилип “биз бүгүнки бу қарар арқилиқ америка һөкүмитиниң мәҗбурий әмгәккә бағлинишлиқ тәминләш зәнҗиригә қарши конкрет қәдәм еливатқанлиқини йәнә бир қетим намаян қилдуқ” дегән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.