Xitay shirketliridin üchi amérika élan qilghan qara tizimlikke kirgüzüldi

Washin'gtondin muxbirimiz eziz teyyarlidi
2024.06.11

Amérika ana weten xewpsizliki ministirliqi 11-iyun élan qilghan bayanatta körsitilishiche, ular xitaydiki déngiz mehsulatliri, alyumin we ayagh kiyimliri ishlepchiqiridighan üch chong shirketni “Uyghur mejburiy emgiki bilen munasiwetlik” dep qarighanliqi üchün qara tizimlikke alghan. Nöwette bu hal “Uyghur mejburiy emgikining aldini élish qanuni” ing ijra qilinishidiki yene bir muhim netije, dep qaralmaqta.

Bayanatta éytilishiche, bu qétim qara tizimlikke kirgüzülgenler ayrim-ayrim halda “Donggu'en bostanliq ayagh kiyim shirkiti”, “Shendung méyjya guruhi” we “Shinjang shénxo kömür we éléktir shirkiti” iken. 2024-Yili 12-iyundin bashlap amérika tamozhna we chégra qoghdash idarisi (CBP) bularning herqandaq mehsulatini aptomatik halda “Uyghur mejburiy emgiki bilen baghlinishliq” dep qaraydiken hemde amérika tamozhnisidin ötüshini men'i qilidiken. Weten xewpsizlik ministirliqining ministiri aléxandro mayorkas (Alejandro N. Mayorkas) Bu heqte söz qilip “Biz herqandaq shekildiki mejburiy emgek mehsulatining amérika chégrasidin ötüshige yol qoyalmaymiz. Bu xildiki mejburiy emgekke chétishliq shirketlerni dawamliq halda tekshürimiz” dégen.

Bayanatta éytilishiche, mezkur ministirliq qarmiqidiki “Mejburiy emgekke qarshi turush xizmet guruppisi” (FLETF) mejburiy emgekke baghlinishliq shirketlerni tekshürüshke mes'ul bolup, Uyghur diyaridiki dawam qiliwatqan qirghinchiliqning jawabkarliqini sürüshte qilish, shuningdek Uyghur we bashqa milletlerge qaritilghan “Insaniyetke qarshi jinayetler” ni chekleshni xizmet nishani qilidiken. Mezkur guruppining re'isi, ana weten xewpsizliki ministirliqining ministir yardemchisi robért silwérs (Robert Silvers) bu munasiwet bilen söz qilip “Biz bügünki bu qarar arqiliq amérika hökümitining mejburiy emgekke baghlinishliq teminlesh zenjirige qarshi konkrét qedem éliwatqanliqini yene bir qétim namayan qilduq” dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.