Америка һөкүмити хитай телефон ширкитиниң америкадики паалийитини чәклигән

Мухбиримиз әркин
2021-10-27
Share

Америка һөкүмити хитайниң дөләт игиликидики хитай телефон ширкитиниң америкадики мәшғулатини дөләт бихәтәрлики әндишиси сәвәблик чәклигән. Бу һәқтики хәвәрләрдә ейтилишичә, америка һөкүмитиниң бу қарари дунядики бу икки чоң иқтисади күчниң ‍ихтилапини техиму өткүрләштүридикән. Америка федератсийә хәвәрлишиш комитети 26-өктәбир хитай телефон ширкитиниң 60 күн ичидә америкадики паалийитини тохтитишини тәләп қилған.

Америка симлиқ хәвәрләр тори-с н н ниң хәвәр қилишичә, америка федератсийә хәвәрлишиш комитети хитай телефон ширкитиниң америкадики тармақ ширкити “хитай һөкүмитиниң пайдилиниши, тәсири вә контроллуқида” икәнлики, бу ширкәтниң йәнә хитайдәк “йетәрлик мустәқил әдлийә назарәтчилики болмиған бир дөләттә, хитай һөкүмитиниң тәләплирини орундашқа мәҗбур болуш еһтималлиқи юқирилиқи” ни билдүргән.

Мәзкур комитетниң ейтишичә, улар бу ширкәткә өткән йили 12-айда американиң әндишилирини пәсәйтиш пурсити бәргән болсиму, бирақ бу ширкәт буни қилмиған.

Америка федератсийә хәвәрлишиш комитети бу һәқтики баянатида: “дөләт бихәтәрликини илгири сүрүш комитетниң җамаәт мәнпәәтини илгири сүрүштики мәсулийитиниң бир қисми. Бүгүнки һәрикәт дөләт алақә ул әслиһәлирини йошурун бихәтәрлик тәһдитидин қоғдаш вәзиписини иҗра қилиду” дегән. Баянатта көрситилишичә, хитай телефон ширкити вә хитай һөкүмитиниң америка алақә системисиға еришиш пурсити, уларниң америкада җасуслуқ вә башқа зиянлиқ һәрикәтләр билән шуғуллинишиға йол ечип берип, американиң дөләт бихәтәрлики вә қанун иҗра қилишиға зор хәвп яратқан.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт