Pirézidént baydin kéler hepte xitayning tokluq aptomobil, küntaxta we dawalash eslihelirige baj qoyushni qarar qilghan

Washin'gtondin muxbirimiz erkin teyyarlidi
2024.05.10

Amérika pirézidénti baydin kéler hepte eng qisqa muddette xitayning tokluq aptomobil, küntaxta mehsulatlirini öz ichige alghan istratégiyelik sana'et ishlepchiqirish türlirige qarita yéngi tamozhna béji qoyushni élan qilmaqchi bolghan.

 “Roytérs agéntliqi” ning bildürüshiche, weqedin xewerdar zatlar bu heqtiki toluq qararning kéler seyshenbe küni élan qilinidighanliqi, sabiq pirézidént donald tramp dewride qoyulghan hazirqi mewjut tamozhna béjiningmu eynen saqlap qélinidighanliqini bildürgen.

 Bu ishtin xewerdar kishiler roytérs agéntliqigha bergen uchurida, yérim ötküzgüch, küntaxta eslihelirige yéngi tamozhna béji qoyulidighanliqi, shuning bilen bir waqitta küntaxta eslihelirige qoyulidighan bajning téximu köpeytilidighanliqini éytqan. Ularning bildürüshiche, baydin hökümiti bu qétimliq baj qoyushta, baj qanunining 301-maddisigha tüzitish kirgüzüp, istratégiyelik riqabet we dölet bixeterlik sahesidiki sana'et türlirige merkezlishidiken.

 “Wol sitrét zhurnili” gézitining bergen xewiride, ehwaldin xewerdar kishiler baydin hökümitining pilani boyiche xitayning tokluq aptomobillirigha qoyulidighan tamozhna béjining töt qatlinishi mumkinlikini éytqan. Halbuki, chet'el tetqiqat orunlirining doklatlirida, xitayning tokluq aptomobil zapchaslirini ishlepchiqirish saheliride Uyghur mejburiy emgikining merkezleshkenlikini ilgiri sürüp kelgen.

 “Roytérs agéntliqi” ning bildürüshiche, oxshash bir waqitta baydin hökümiti yene xitayning 37 shirkitini cheklesh tizimlikige kirgüzgen. Xewerlerde, cheklesh tizimlikidiki shirketlerning ichide dölet igilikidiki xitay éléktironluq téxnologiye guruhigha qarashliq tarmaq shirketlerning barliqini bildürmekte. Taratqularning bildürüshiche, xitay éléktironluq téxnologiye guruhi xitay armiyesini herbiy esliheler bilen teminleydighan asasliq shirketlerning biri iken. Bu shirketning bir tarmiqining 2023-yili amérika hawa boshluqigha üsüp kirgen xitay jasusluq hawa sharini yasighanliqi qeyt qilinmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.