Xitay sayahet shirketliri xitay puqralirini ottura asiya ellirige sayahetke teshkilleshke bashlighan

18-May küni xitay bilen ottura asiyadiki besh jumhuriyetning rehbiri xitayning shi'en shehiride soda we soda ul eslihelirining istratégiyelik tereqqiyat pilanini élan qilip, öz'ara munasiwetni téximu chongqurlashturidighanliqini élan qilghan bir peytte, xitay sayahet shirketliri xitay puqralirini ottura asiya jumhuriyetlirige keng kölemlik sayahetke teshkilleshke kirishken. Xitay hökümiti 2017-yili bashlan'ghan chong tutqunda Uyghurlarni keng kölemlik lagér, türmilerge qamap, milyonlighan kishini mejburiy emgekke sélish bilen bir waqitta, xitay puqralirini Uyghur rayonida keng kölemlik “Wetenperwerlik” sayahet pa'aliyetlirige teshkillep, ularning kallisigha Uyghur ilining ezeldin xitay zémini ikenlikini singdürüshke kirishken idi.

“Tengri tagh” torining 22-may xewer qilishiche, xitayning “Shinjang xelq'ara sayahet cheklik mes'uliyet shirkiti” 4-ayning axirliridin bashlap “Yüz ömek ming kishilik ottura asiya sayahiti” ni bashlighan. Tunji türkümde 36 kishilik bir xitay sayahet guruppisi ottura asiya jumhuriyetlirini sayahet qilish üchün yolgha chiqqan. Mezkur sayahet shirkitining bash diréktori jaw buningdin kéyin xitayning “Ottura asiyadiki besh jumhuriyet bilen bolghan medeniyet, sayahet alaqisi téximu küchiyidu. Shinjangdin ottura asiya döletlirige sayahet qilish téximu qulayliq we ongushluq bolidu” dégen.

Xitay taratqulirining xewerliridin melum bolushiche, Uyghur aptonom rayonluq medeniyet, sayahet nazariti 22-may küni xitay puqralirining ottura asiya sayahitini kücheytish toghrisida mexsus yighin ötküzgen. Xitayning ottura asiya jumhuriyetliridiki tesirining kéngiyishi, bu jumhuriyetlerdiki puqralarni endishisini kücheytiwatqan, bolupmu qazaqistan we qirghizistan puqralirining endishisini qozghawatqan bir waqitta, bu jumhuriyetlerning xitay bilen bolghan munasiwetni téximu kücheytishi diqqet qozghidi. Qazaqistanning yéqinda xitay pasportigha wizini bikar qilishi qazaqistan puqralirining naraziliqini qozghighan, bezi jaylarda buninggha qarshi naraziliq heriketliri yüz bergenidi.