Xitay siyasiy kéngishining mu'awin re'isi tor kontrolluqini tenqid qilghan

Muxbirimiz ümidwar
2017-03-05
Élxet
Pikir
Share
Print

Xitay memliketlik siyasiy kéngeshning bir neper mu'awin re'isi xitayning tor tekshürüsh we nazaret qilish tüzümini ashkara tenqid qilghan.

B b s agéntliqining xewer qilishiche, xitay memliketlik siyasiy kéngishining mu'awin re'isi lo fuxé 1-mart küni, yeni xitay siyasiy kéngesh yighini échilish harpisidiki muxbirlarni kütüwélish yighinida özining otturigha qoymaqchi bolghan teklip layihesini tonushturghan.

Mezkur siyasiy kéngesh mu'awin re'isi sözide nöwette xitayning ichidin chet'el tor betlirini ziyaret qilish sür'itining astilap kétiwatqanliqi hem nazaretning küchlük ikenliki, bu ehwallarning xitayning iqtisadi tereqqiyati we ilim-pen tetqiqat ishlirigha selbiy tesir körsitiwatqanliqini ilgiri sürgen.

Uning qarishiche, chet'el torlirini ziyaret qilishqa qarita échiwétish we rawajlandurush éhtiyajini temin étish kérek. Uning éytishiche, tekshürüsh doklatigha asasen, hazir xitayda ishlewatqan chet'ellik mutexessisler, alimlar, yaki chet'eldin tetil munasiwiti bilen xitay hem xongkonggha kelgenlerning özlirining chet'ellerdiki uniwérsitétliri yaki tetqiqat orunlirining torlirigha kirishi we munasiwetlik tetqiqat matériyallirini körüshi teske toxtaydiken, hetta chet'ellerdiki shirketlerning torlirigha kirishmu tes iken.

Melum bolushiche, xitay chet'ellerdiki köpligen uchur-axbarat torlirining xitayda körülüshigimu qattiq tedbir qollan'ghan bolup, tibet, teywen we Uyghurlargha a'it sezgür sözler hem témilargha qarita tekshürüsh hem tosushni kücheytken, hetta tam atlap kirishnimu qattiq tosuwatqan bolup, buni qanunsizliq katégoriyesige kirgüzgen idi. Elwette, Uyghurlarning chet'ellerdiki Uyghur tilidiki tor betlerge kirishi qattiq cheklen'gen we nazaret astigha élin'ghanliqi melum.

Toluq bet