Xitay siyasi kéngesh wekili “Mutleq dölet bixterliki” ni qoghlishishning xitayni sowétche yiqilishqa élip baridighanliqini agahlandurghan

Muxbirimiz erkin
2022-01-24
Share

Xitay memliketlik siyasi kéngishining ezasi, xelq'ara munasiwetler mutexessisi jya chinggo “Xelq'ara xewpsizlik tetqiqati” zhornilida maqale élan qilip, xitayning qarghularche “Mutleq dölet bixeterliki” ni qoghlishishining uni sabiq sowét ittipaqidek yiqilishqa élip bérishi mumkinlikini agahlandurghan. Uning körsitishiche, “Mutleq dölet bixeterliki” ni qoghlishish éghir bedel telep qilidiken. Bu maqale shi jinping we xitay kompartiyesi dölet ichide yuquri téxnikiliq nazaret sistémisi arqiliq “Mutleq bixeterlik” berpa qilishni qoghlishiwatqan bir waqitta élan qilinip diqqat qozghighan.

“Jenubiy xitay etigenlik pochtisi” gézitining xewer qilishiche, jya chinggo meqaliside chéki yoq bixeterlikni qoghlishish “Chiqimning shiddetlik artishi we paydisining shiddetlik töwenlishini keltürüp chiqirip, chiqimning paydini bésip chüshidighanliqi” ni bildürgen. U mundaq digen: “Bixeterlikning nisbiylik xaraktirige sel qarash, uni qarghularche qoghlishish, döletni mutleq rewishte téximu az bixeterlikke érishtüridu. Chünki u kötürgüsiz chiqimlarni keltürüp chiqirip, mutleq bixeterlikke érishtürmeydu.”

Melum bolushiche, béyjing uniwérsitéti xelq'ara munasiwetler fakultiténing mezkur sabiq mudiri, 22 betlik maqaliside xitayning bixterlik siyasitini wastiliq tenqid qilghan. Buning aldida xitayning amérikada turushluq sabiq bash elchisi süy tyenkeymu xitayning “Urushqa böre” diplomatiyesini tenqid qilghan idi. Jiya chinggo, sowét ittipaqining zor miqtardiki herbiy chiqimi uning uzun muddetlik bixterliki üchün paydisiz amilgha aylan'ghanliqi, uning iqtisadiy tereqqiyatigha yük bolup, axirida herbiy chiqimini qamdiyalmas ehwalgha chüshürüp qoyghanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet