Da'iriler milliy medeniyet bayramliri arqiliq “Diniy radikalliq” qa zerbe béridighanliqini teshwiq qilmaqta

Xitay axbaratlirining xewer qilishiche, da'iriler noruz qatarliq milliy bayramlarni teshebbus qilish arqiliq “Diniy ashqunluq idiyisi yamrap kétishining aldini élip we milletler ittipaqliqini” kücheytmekchi bolghan.

Bu xildiki xewerler xitayning“Shinjang xewerliri”, “Xelq tori”, merkizi xelq radi'osi qatarliq hökümet taratqulirida we herqaysi wilayet, oblastlarning hökümet torlirida köplep bérilgen.

Xewerlerde, 2016-yilliq noruz bayrimi ning Uyghur aptonom rayonida “Zor daghdugha” bilen kütüwélin'ghanliqi körsitilgen.

“Shinjang xewerler tori” da körsitishiche, sanjida ötküzülgen bir noruz pa'aliyitige yerlik meschitining ghopur axun imami teklip qilinip “Diniy ashqunluqni yoqitish” témisida léksiye sözlitilgen.

Xitay da'iriliri ilgiri noruz “Doppa bayrimi” qatarliq bayramlarning Uyghur élide tebriklinishke bir xil soghuq mu'amilide bolup kelgen idi.

Halbuki xewerlerge qarighanda, bu yilliq noruz pa'aliyiti Uyghur élining yéza qishlaqlirigha qeder keng teshwiq qilin'ghan.

Xewerlerdin melum bolushiche, herqaysi sheher, nahiyiler hökümet mexsus meblegh ajritip noruzni en'eniwi adetler boyiche, “Bagh seylisi qilish”, “Kolléktip noruz éshi yéyish”, “Noruz béyiti éytish”, “Dala meshripi ötküzüsh”, “Sen'et ömeklirini teshkillep amma arisida konsért qoyush” qatarliq pa'aliyetler bilen ötküzgen.

Xewerlerde idare-jem'iyet, mekteplerde ötküzülgen pa'aliyetlerge xitay kadir, oqughuchilar hetta shu yéza, mehellilerdiki xitay puqraliriningmu ishtirak qilghanliqi, bu yilqi noruzning milletler ittipaqliqini namayan qilghanliqi alahide eskertilgen.