Хитайда «омумий хәлқ дөләт хәвпсизлики тәрбийәси» қанат яйдурулушқа башлиған

Мухбиримиз ирадә
2020-04-16

4-Айниң 15-күни хитайниң «омумий хәлқ дөләт хәвпсизлики тәрбийәси күни» болуп, бу мунасивәт билән уйғур елидики һәрқайси чоң университетларда мәхсус бу һәқтә тор арқилиқ тәшвиқат тәрбийә һәрикити қанат яйдурулған.

«Тәңритағ тори» ниң бу һәқтики хәвиригә қариғанда, уйғур елидики университетларда «дөләт хәвпсизлики тәрбийәси» бойичә охшимайдиған тәрбийәләш усуллири қанат яйдурулидиған болуп, униңда алий мәктәп оқуғучилириниң чоқум сиясий аң, идийә вә һәрикәттә партийә билән бирдәкликни сақлап, дөләт бихәтәрликиниң һәммә адәмниң мәсулийити икәнликини һәр вақит есидә чиң тутуши керәклики, мәхпийәтлик еңини өстүрүп, дөләт мудапийәсини қоғдаш үчүн күчлүк мудапийә линийәси болуши керәклики тәкитлинидикән.

Хитай һөкүмити таҗсиман вирусни бир тәрәп қилиш мәсилисидә хәлқарада күчлүк тәнқидкә учраватқан бир пәйттә униң дөләт ичидә «омумий хәлқ дөләт хәвпсизлики тәрбийәси» ни тәкитлиши диққәт қозғайдикән. Хитай һөкүмити таҗсиман вирусниң юқум әһвалини аммидин йошуруп, хитайниң ичи вә чәтәлләрдә милйонлиған кишиниң вирус билән юқумлиниши вә йүзмиңлиған кишиниң өлүмигә сәвәбчи болди, дәп әйибләнмәктә. Хитай хәлқ аммиси арисидиму наразилиқниң күчәйгәнлики мәлум.

Хитай һөкүмити болса әксичә дөләт ичидә һәммә нәрсини дөләт мәхпийәтликигә бағлап тәшвиқ қилишни күчәйткән. Мәлум болушичә, «дөләт хәвпсизлики тәрбийәси» ни омумлаштуруш тәшвиқати мәзгилидә һәрқайси җайларда «дөләт хәвпсизлики тәрбийәси» дәрси өтүш, кочиларда тәшвиқат нуқтиси тәсис қилиш, аммиви елан тарқитиш қатарлиқ шәкилләр арқилиқ дөләт хәвпсизлики билимлирини орган, мәһәллә, мәктәп қатарлиқларғичә киргүзүлидикән.