Д у қ баянатчиси дилшат ришит: “җаң чүншйәнниң чөчәк, бортала чегра зиярити вәзийәт әнсиришиниң ипадиси”

Мухбиримиз меһрибан
2016.08.02
Share on WhatsApp
Share on WhatsApp

Дуня уйғур қурултийи баянатчиси дилшат ришит хитайниң уйғур дияриға тәйинлигән партком секретари җаң чүншйәнниң 31-июл вә 1-авғусттики чөчәк, бортала чегра зияритиниң, өткән җүмә күни уйғур район даирилири “террорлуққа зәрбә бериш қанунини йолға қоюш чариси” ни елан қилғандин кейинла елип берилишиниң хитай һөкүмитиниң уйғур вәзийитидин әнсирәватқанлиқиниң ипадиси икәнликини билдүрди.

Дилшат ришит 2-авғуст радийомиз зияритини қобул қилғинида бу һәқтә тохтилип, “хитай әмәлдари җаң чүншйән икки күндин буян оттура асиядики қазақистан билән чегрилинидиған чөчәкниң бақту чегра еғизи вә борталадики алатав чегра еғизида чегра сақлиғучи әскәрләр вә қораллиқ сақчилардин һәрқандақ шараитта ирадиси мустәһкәм һалда дөләт чеграсини қоғдап, район муқимлиқини сақлашни тәләп қилғанлиқи вә чөчәк шәһиридики зияритидә милләтләр иттипақлиқини күчәйтип, диний радикаллиққа зәрбә беришни тәкитлигәнлики мәлум болди. Җаң чүншйәнниң бу қетимқи зияритиниң 29-июл уйғур даирилири ‛террорлуққа зәрбә бериш қанунини йолға қоюш чариси‚ ни елан қилғандин кейинла елип берилиши диққәт қозғайду. Мениңчә бу қетимқи зиярәт хитай һөкүмитиниң уйғур райони вәзийитидин қаттиқ әнсирәватқанлиқиниң ипадиси” деди.

Хитай хәвәрләр ториниң 2-авғуст күни “шинҗаң гезити” дин нәқил елип хәвәр беришичә, җаң чүншйән чөчәк вә борталадики икки күнлүк зияритидә чегра қаравуллири, қораллиқ сақчилардин вә чөчәктики хитайниң дөләт байриқини өз қорусида чиқириш билән тонулған милләтләр иттипақлиқи нәмуничиси садиқҗан қатарлиқлардин алаһидә һал сориған.

Хәвәрдә тилға елинишичә, җаң чүншйән 1962-йилидики или, чөчәк хәлқиниң әйни чағда сабиқ совет иттипақи тәвәликидики қазақистан, қирғизистан қатарлиқларға қечиш вәқәсидин кейин қурулған хитай чегра мудапиә әскәрлирини зиярәт қилғинида улардин “чоң шамалда тәврәнмәслик, мәнпәәткә берилмәслик, күчлүк дүшмәнниң һийлисигә алданмаслиқ” ни тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.