Xitay hökümitining aliy mektep oqughuchilirigha qaritilghan siyasiy teshwiqati dawam qilmaqta

 Yéqinqi mezgillerde xitay hökümiti Uyghur diyaridiki herqaysi aliy mekteplerge öz emeldarlirini ewetish arqiliq aliy mektep oqughuchilirigha özlirining nöwettiki siyasiy  nishanliri üchün xizmet qilishni tekitlep kéliwatqanidi. Shu qatarda 30-may küni Uyghur aptonom rayonluq partkom teshwiqat bölümining bashliqi wang jyenshin “Shinjang sen'et instituti”gha kélip bir meydan siyasiy teshwiqat léksiyesi bergen.

Xitay bashqurushidiki “Tengritagh” torining 30-maydiki xewiride éytilishiche, uning léksiyeside “20-Qurultayning rohini chongqur öginish, yéngi dewrdiki shinjangni idare qilish istratégiyesini toluq we toghra izchillashturush” muhim téma bolghan. Shuningdek aliy mektep oqughuchilirini xitay millitining “Büyük güllinishi” ge küch chiqirishqa dewet qilghan. U sözide éniq qilip “Medeniyet arqiliq shinjangni sughirish partiyemizning yéngi dewrdiki shinjangni idare qilish istratégiyesining muhim terkibi qismi. Shinjang xizmitining bash nishanini emelge ashurush, uzun mezgillik eminlik ornitishning tüpki we uzun mezgillik asasi” dégen.

Wang jyenshinning sözliri xitay hökümitining nöwettiki “Shinjangni medeniyet arqiliq sughirish qurulushi” ning mahiyitini wasitilik halda échip bergenlik, dep qariliwatqanliqi melum. Chünki ular éytiwatqan bu qurulushtiki “Medeniyet” ning Uyghur diyaridiki barliq medeniyet sahesini weyran qilip, uning ornigha xitay medeniyitini dessitish ikenliki yéqinqi mezgillerde Uyghur diyarida otturigha chiqqan medeniyet buzghunchiliqida ashkara otturigha chiqqanidi. Bu sahediki eng tipik misallar yéqinqi mezgillerde köplep otturigha chiqiwatqan bolup, üchturpandiki imamlirim yézisida qurulghan “Dölet tili mektipi” ning mudiri qurban niyazning Uyghur sebiylirige xitayche changchile ögitishi, chaqiliq nahiyesidiki Uyghur ösmürlirining “Jungxu'a medeniyitining séhri küchini hés qilishi” üchün ularni changchile oynashqa teshkillishini shular jümlisidin déyish mumkin.