Yawropa we ‍amérika soda sahesi xitaygha bolghan ishenchini yoqitishqa bashlidi

Muxbirimiz eziz
2022.09.21

“Wal strét zhurnili” gézitining 21-séntebirdiki obzor maqaliside körsitilishiche, soda we diplomatiye sahesi xitayni emdi köngüldikidek nishan ‍emes, dep qarashqa bashlighan. Bolupmu xitayning tajsiman wirusning yuqumini kontrol qilish heqqidiki birqatar siyasetliri tüpeylidin dunyawi siyasiy jughrapiye miqyasida xitaydin yiraqlishish yüzlinishi shekillinishke bashlighan.

Obzorda éytilishiche, ilgiriki waqitlarda nurghun soda shirketliri chet'elge kéngiyish heqqide söz bolghanda birinchi bolup tallaydighan nishani xitay bolup, ularning xitaydiki soda pa'aliyetlirining qaysi derijide rawaj tépishi shu shirketning kelgüsidiki tereqqiyatini belgileydighan bir muhim ölchem bolup kelgeniken. Emma ötken bir yilda amérika we xitay terep élan qilghan soda körsetküchliri birdek chet'el shirketlirining hemde chet'el soda sahesige mensup xizmetchilerning xitaydin köchüp kétiwatqanliqini, bu yüzlinishning hazir barghanséri yughuri pellige chiqiwatqanliqini körsetmekte iken. Buningda xitaydiki éghir qamalning iqtisad sahesige biwasite bésim peyda qilishidin bashqa xitayning chet'elliklerge qaratqan wiza kontrolluqi, xitayning xelq'ara siyasiy sehnidiki obrazining xunüklishishi dégenlermu buningdiki muhim seweblerdin iken. Ular buninggha misal qatarida biraziliyening xitaydiki elchixanisida ishleshke razi bolidighan diplomatiye xadimini tapalmasliqidek ehwalni bayan qilidu.

Roytérs agéntliqining 21-séntebirdiki xewiride éytilishiche, yawropadiki eng chong soda guruhi bolghan “Yawropa soda chembiri” shu küni agahlandurush chiqirip xitaygha bolghan ishenchining yoqalghanliqini, shuningdek xitayning köngüldikidek meblegh sélish nishani emeslikini tekitligen.

Xewerde éytilishiche, mezkur teshkilat özige eza bolghan 1800 shirketke bu ehwalni uqturghan bolup, yawropa ittipaqi we yawropa shirketlirining xitay bilen soda alaqiside bolush heqqidiki ming parchigha yéqin tewsiyeliri asasidiki doklatta mushu ehwalni nuqtiliq sherhligen. Doklatta xitaydiki “Wirusni nölge chüshürüsh” siyasitining tesiri, xitayning teywen siyasiti qatarliqlar nuqtiliq tilgha élinip “Yawropa ittipaqi xitay bilen bolghan soda munasiwitini oyliship körüshi kérek” déyilidu. Gerche uningda xitayning dunyadin ayrilip qéliwatqanliqidiki bashqa sewebler tilgha élinmighan bolsimu nöwette xitayni istratégiyelik soda shériki dep qarash yüzlinishi barghanséri töwenleshke bashlighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.