9-Айдики хитайниң експорт вә импорти мөлчәрдикидин хелила төвәнлиди

14-Өктәбирдики таможна санлиқ мәлуматлириниң көрситишичә, 9-айда хитайниң експорти өткән йилдикигә селиштурғанда 2.4 Пирсәнт ашқан, импорт болса 0.3 Пирсәнт ашқан. Ройтерс агентлиқиниң рай синаш нәтиҗисигә қариғанда, юқиридики һәр икки хил ешиш анализчиларниң ойлиғинидин хелила төвән болған. Хитайдики истемал сәвийәсиниң төвән болуши вә өй-мүлүктики төвәнләш хитай иқтисадиға тәсир қилған әң муһим амиллар дәп қаралмақта.

Анализчилар хитайниң експорт вә импортиниң техиму тез ешишни мөлчәрлигән болуп, ройтерс агентлиқиниң рай синаш нәтиҗиси 9-айда хитайниң експорти 6 пирсәнт, импорти 0.9 Пирсәнт өрләйдиғанлиқини оттуриға қойған. Лекин 9-айдики әмәлийәт мөлчәрдикидин хелила төвән болған.

CNBC Ниң хәвиригә асасланғанда, хитай даирилири алдинқи айниң ахиридин башлап бәзи риғбәтләндүргүчи сиясәтләрни оттуриға қойған болсиму хитай һөкүмити һазирға қәдәр нурғун мәбләғ салғучилар үмид қилған малийә сияситини оттуриға қоймиған. Хитайниң малийә вә иқтисадий сиясити үстидә талаш-тартиш болуватқанда хитай базиридики пай чекидә шиддәтлик давалғуш болған.

Хитай компартийәсиниң 20-нөвәтлик 3-омумий йиғинида ши җинпиң хитай дуч келиватқан иқтисадий касатчилиққа тақабил туруш үчүн “бир қатар иқтисадий ислаһатлар” ни оттуриға қойған иди. Һалбуки мутәхәссисләр хитайда мәвҗут болуватқан көплигән системилиқ мәсилиләрни “хитайниң 2024-йилдики вәзийитигә тәсир көрситиду” дәп көрсәткән иди. Шуниң билән биргә, ши җинпиңниң дөләт ичидики бир йүрүш иқтисадий мәсилиләрни һәл қилиш үчүн мәбләғ селишни өстүрүш, санаәтни тәрәққий қилдуруш вә експорт миқдарини ашуруш тәдбирлирини әмәс, әксичә базар вә иқтисадий қурулма ислаһати елип бериши керәкликини илгири сүрмәктә.