Явропа иттипақиниң содиға мунасивәтлик қарарлири хитайни нарази қилди

Мухбиримиз ирадә
2017.12.21

Явропа иттипақи алдинқи күни хитайдин импорт қилиниватқан “һәддидин ташқири” әрзан малларни байқут қилиш үчүн йеңи тәдбирләрни елан қилди вә хитай иқтисадини “һөкүмәт тәрипидин башқурулидиған иқтисад,” дәп көрсәтти.

Ройтерс агентлиқиниң хәвәр қилишичә, явропа иттипақи чаршәнбә күни 465 бәтлик бир доклат елан қилип, хитай һөкүмитиниң йәр-земин вә капитал қатарлиқ мәнбәләрниң тәқсиматиға қол тиқиш арқилиқ карханиларниң мәһсулат баһалириға зор дәриҗидә тәсир көрситиватқанлиқини билдүргән.

Униңда баян қилинишичә, хитай һөкүмити баһани сүний усулда контрол қилип, чәтәлгә експорт қиливатқан маллириниң баһасини дөләт ичидики мал баһасидинму төвән қиливәткәчкә, чәтәл карханилириниң хитай карханилири билән риқабәтлишиши имкансиз болуп қалған. Җүмлидин улар үчүн адил болмиған бир риқабәт вәзийити шәкилләнгән икән.

Хәвәрдин қариғанда, явропа иттипақи бу доклаттики қарарға асасән мушу хилдики мәсилиләргә қарши тәдбир елиш үчүн җиддий һәрикәткә өткән, әмма хитай буниңдин нарази болған. Бүгүн хитай ташқи ишлар министирлиқиниң баянатчиси хуа чүнйиң явропа иттипақини “қәстәнгә баһанә чиқириватиду,” дәп әйиблигән. У йәнә “явропа иттипақи ‛дуня сода тәшкилати‚ ниң қаидилиригә әмәл қилмиди,” дегән.

Игилинишичә, явропа иттипақи хитайдин киргүзүлүватқан електронлуқ велисипитләрниңму хитайниң дөләт ярдимигә еришкән болуш еһтималлиқини илгири сүрүп, буниңға қарита йәнә бир тәкшүрүш башлиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.