Xitay “Dölet bixeterliki” ge ziyan salghan shexslerni we “Térorluq herikeliri” ni sot sirtida sotlashni yolgha qoyghan
2021.03.01
Xitay hökümiti xitayning “Jinayi ishlar dewa qanuni” gha tüzitish kirgüzüp, “Dölet bixeterliki” ge ziyan salghan shexslerni we “Térorluq heriketliri” ni gumandar chet elde bolsimu, sot sirtida sotlaydighanliqini élan qilghan. Xitay merkizi téléwiziye istansisining xewer qilishiche, xitay aliy sot mehkimisi mezkur qanun maddisigha chüshenche bergen bolup, bu madda 1-marttin bashlap resmi ijra qilinidiken. Xitay da'irilirining bu qarari közetküchilerning diqqitini qozghighan.
Ularning qarishiche, bu madda chet elediki lagér shahitlirini, a'ile ezalirining iz-dérikini qiliwatqan Uyghur muhajirlirini, shuningdek Uyghur teshkilatlirini we pa'aliyetchilirini “Térorluq” bilen eyiblep kéliwatqan xitayning “Térorluq” ni yene süyi'istémal qilip, chet eldiki xalighan Uyghurni “Térorluq” bilen sotlap jinayet békitishi we xitaygha qayturup bérishni telep qilishi üchün “Qanuniy asas” hazirlaydiken. Xitay merkizi téléwiziye istansisining xewiride buning chet elge qéchip ketken parixorluq, xiyanenchilik délolirinimu öz ichige alidighanliqini bildürgen.
Melum bolushiche, xitayning bu qétimqi “Jinayi ishlar dewa qanuni” gha tüzitish kirguzush maddisi yene jinayi jawapkarliq yash chéklimisini 12 yashqa töwenletken, shuningdek dölet bayriqi, dölet gribi, dölet marshi qatarliqlargha “Haqaret” qilghan shexslerni jazalashqa alaqidar konkirét tepsilatlarni öz ichige alghan iken.