Général miléy: “Xitay amérika we ittipaqdashliri üchün téximu tajawuzchi we xeterlik bolmaqta”
2022.07.25
Amérika armiyesining birleshme shtab bashliqi général mark miléy, xitayning amérika we uning ittipaqdashliri üchün téximu tajawuzchi we téximu xeterlik halgha kelgenlikini bildürgen. Birleshme agéntliqning xewer qilishiche, général miléy ötken hepte hindonéziyeni öz ichige alghan hindi-tinch okyan rayonidiki döletlerde ziyarette bolghan. U bu jeryanda xitay armiyesining ötken besh yildin buyan körünerlik derijide téximu tajawuzchi, téximu xeterlik ehwalgha kelgenlikini éytqan. Général miléy “Xitay armiyesi meyli déngizda, meyli hawada bolsun bu rayonda körünerlik we diqqet qilarliq derijide téximu tajawuzchi halgha keldi” dep körsetken.
Général miléyning éytishiche, xitay ayropilanliri we paraxotlirining tinch okyan rayonida amérika we uning shériklirige mudaxile qilish qétim sani körünerlik ashqan, shundaqla xeterlik mudaxililerde bolush qétim sanimu oxshash kölemde köpeygen. Général miléy bu sözlerni amérika xitayning bu rayondiki tesirige qarshi özining tinch okyandiki döletler bilen bolghan munasiwitini téximu kücheytken, baydén hökümiti xitayni “Téz küchiyiwatqan tehdit”, shundaqla amérikaning eng muhim “Uzun muddetlik riqabetchisi” dep qarawatqan bir waqitta éytqan. Birleshme agéntliqining bildürüshiche, général miléyning hindi-tinch okyan döletlirige qilghan ziyariti keskin rewishte xitay tehditige merkezleshken.
Xewerde, uning bu hepte awstraliyening sidnéy shehiride ötküzülidighan hindi-tinch okyan döletliri mudapi'e bashliqlirining yighinigha qatnishidighanliqi, yighinning achquchluq témisimu xitayning izchil küchiyiwatqan herbiy küchi we rayonda tinch, erkin hem échiwétilgen bir tinch okyanni saqlap qélishni merkez qilidighanliqi tekitlen'gen. Buning aldida amérika merkizi istixbarat idarisining bashliqimu xitayning kelgüsi bir nechche yilda teywen'ge qoralliq hujum qilishi müükinlikini éytqanidi.
Birleshme agéntliqning bildürüshiche, xitay azadliq armiyesining birleshme bash shtab bashliqi li zuchéng yéqinda général miléygha xitayning teywen'ge oxshash mesililerde “Muresse qilmaydighanliqi” ni éytqan.