Xitay taliban bash elchisini qobul qilghan tunji dölet boldi

Xitay taliban hökümitining bash elchisini resmiy qobul qilip, afghanistanda hakimiyetni tartiwalghan ikki yildin buyan xelq'ara jem'iyetning resmiy étirap qilishigha érishelmigen talibanlarning béyjingda bash elchi turghuzushigha ruxset qilghan tunji dölet bolghan.

Amérika taratqulirining xewer qilishiche, taliban hökümiti ‍ötken hepte béyjingning taliban bash elchisini qobul qilip, künséri küchiyiwatqan ikki dölet munasiwitide “Muhim bir sehipe” achqanliqini élan qilghan. Taliban hökümitining bayani béyjing hökümiti teripidin téxi delillenmigen bolsimu, biraq uning taliban bash elchisini qobul qilghan tunji dölet bolup qalghanliqi qeyt qilinmaqta.

Buningdin 3 ay burun xitay kabulgha bash elchi teyinligenlikini jakarlighan idi.

Gerche xitay kabulgha bash elchi teyinligen, shundaqla béyjingda turushluq taliban bash elchisini qobul qilghan bolsimu, biraq xitay yaki bashqa herqandaq bir dölet taliban hakimiyitini resmiy étirap qilghanliqini ashkara élan qilip baqmighan.

“Amérika awazi” ning bildürüshiche, taliban tashqi ishlar ministirliqi ötken jüme küni élan qilghan bayanatida, xitay tashqi ishlar ministirliqi kütüm (protokol) bölümining bashliqi xong léyning taliban bash elchisi esedulla bilal kerimining bash elchilik xétini qobul qilghanliqini éytqan. Bayanatta tekitlishiche, xong léy kerimining béyjinggha kélishi, béyjing bilen kabulning “Ijabiy munasiwitini kücheytish we kéngeytish yolidiki muhim qedem” dep körsetken.

Taliban qoralliq küchliri 2021-yili, afghanistanda 20 yildin artuq höküm sürgen démokratik hökümetni aghdurup hakimiyetni tartiwalghan idi.