Xitayning afghanistan bilen resmiy diplomatik alaqe ornitishi zor ghulghula qozghidi

Washin'gtondin muxbirimiz eziz teyyarlidi
2024.02.01

30-Yanwar küni afghanistandiki taliban hökümitining xitayda turushluq bash elchisi esedulla bilal kerimi dölet xétini xitay re'isi shi jinpinggha tapshurghan.

En'gliyede chiqidighan “Téz poyiz” gézitining bu heqtiki xewiride éytilishiche, shu küni shi jinping béyjingdiki “Xelq sariyi” da bash elchi esedulla we bashqa döletlerning yéngidin teyinlen'gen bash elchiliridin 42 kishini kütüwalghan. Buning bilen xitay resmiy halda taliban hökümitini étirap qilghan tunji chong dölet bolup qalghan. Xitay tashqi ishlar ministirliqining bayanatchisi wang wénbin bu heqte söz qilip, “Biz afghanistanni xelq'ara diplomatiye sahesidin chette qaldurushni durus körmeymiz” dégen.

Taliban hökümitining xitay bilen resmiy diplomatik alaqe ornitishi melum bolghandin kéyin, herqaysi sahening zor diqqiti qozghalghan. Amérika tashqi ishlar ministirliqining bayanatchisi mesyo millér (Matthew Miller) bu heqte söz qilip, “Bu xil munasiwetning némidin dérek bérishi heqqide xitay hökümiti gep qilsun. Biz bu heqte köpligen selbiy inkaslarni körduq” dégen. Melum bolushiche, xitayning afghanistanda turushluq bash elchisi jaw shing 2023-yili séntebirde özining bash elchilik guwahnamisini taliban hökümitining bash ministiri mullah muhemmed hesen axun'gha tapshurghan idi.

Xitay hökümitining xelq'arada téxi étirap qilishqa érishelmeywatqan, shuningdek izchil türde térrorluqqa baghlinip kéliwatqan taliban hökümiti bilen resmiy bash elchi derijilik diplomatik alaqe ornitishi, herqaysi sahe kishiliri arisida zor ghulghula qozghighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.