Donald tramp xitaygha qaritilghan tamozhna béji heqqide resmiy söz qildi

Roytérs agéntliqining 21-yanwardiki xewiride éytilishiche, amérika pirézidénti donald tramp shu küni muxbirlargha söz qilip, 2025-yili 1-féwraldin bashlap xitaydin kélidighan tawarlargha 10 pirsent tamozhna jazasi élan qilishni muzakire qiliwatqanliqini bildürgen. U buning sewebi heqqide toxtilip, “Xitay hazirmu méksika we kanada arqiliq ghayet zor miqdardiki féntanilni amérika tewesige yollawatidu” dégen.

Pirézidént trampning sözi tézdin xitay terepni jiddiyleshtürüwetkenliki melum. Xitay tashqi ishlar ministirliqining bayanatchisi maw ning muxbirlarni kütüwélish yighinida bu heqtiki so'allargha jawab bérip, “Biz her waqit amérika terep bilen söhbetlishishni, shu arqiliq perqlerni tügitip ortaq menpe'ettiki hemkarliqni kücheytishni xalaymiz” dégen, shuningdek özlirining amérika bilen muqim we uzun muddetlik hemkarliq ornitishni isteydighanliqini bildürgen. Emma ular yene buninggha qoshumche qilip, “Xitay herqachan özining dölet menpe'etini mustehkem halda himaye qilidu” dégen.

Bu qétimqi tamozhna béji qoyulidighan döletler qatarida yawropa ittipaqi we kanadamu bar bolup, aqsarayning soda meslihetchisi pitér nawaro (Peter Navarro) bu heqte toxtilip, “Buningdiki asasliq meqset qanunsiz köchmenler we féntanilning izchil kanada we méksika arqiliq amérika tewesige ötüsh mesilisige chek qoyush” dégen.

Pirézidént tramp saylam mezgilide xitaydin kéliwatqan féntanilning amérika xelqini zeherleshte bekmu qabahetlik rol oynawatqanliqini alahide tekitligen hemde nawada saylamda yéngip chiqsa, bu mesilini tézdin hel qilishqa tirishidighanliqini bildürgen idi. Nöwette bu mesilining tamozhna béji bilen baghlinishi ashu wedining deslepki qedemde ishqa éshishi, dep qaralmaqta.