Mikronéziye prézidénti xitayni özlirige qarita “Siyasiy urush” qozghash bilen eyiblidi

Tinch okyandiki aral döliti-mikronéziyening prézidénti yéqinda siyasiy sahesidiki zatlargha xet yézip, xitayni özlirige qarita “Siyasiy urush” qozghash bilen eyibligen, shundaqla mikronéziyening xitay bilen bolghan diplomatik munasiwitini üzüp, teywen bilen diplomatik munasiwet qurushni otturigha qoyghan. Birleshme agéntliqning xewer qilishiche, prézidént deywid panélo 9-mart küni yazghan 13 betlik xétide, xitayning jasusluq qilish, para bérish qatarliq usullarni ishlitip, eger xitay teywen'ge urush échip qalsa mikronéziyening amérika terepte emes, xitay terepte turushi yaki héch bolmisa biterep turushigha kapaletlik qilmaqchi bolghanliqini éytqan.

Deywid pdnélo mundaq dégen: “Qimmet qarishimizning shu'an bizge qarshi qolliniliwatqanliqigha ishinimen”, “Xitayning siyasiy urushining nurghun sahelerde utuqluq bolushidiki seweblerning biri, shérik bolush we süküt qilishimiz üchün para élishimizdur”.

Uning körsitishiche, mikronéziyening mu'awin prézidénti kéngesh palata ezasi waqtida xitayning bash elchisi uning pul sélin'ghan bir konwért bergen, lékin u konwértni qobul qilishni ret qilghaniken.

Panélo yene xitay tekshürüsh kémilirining mikronéziye déngiz tewelikide jasusluq pa'aliyiti qilghanliqi, tebi'iy bayliq we déngiz asti yollirini xeritige alghanliqi, özining ötken yili fijida ötküzülgen “Tinch okyan munbiri” ning yighinigha barghanda fijidiki xitay elchixanisining ikki istixbarat xadimi uning izigha chüshkenlikini bildürgen.

U: “Nahayiti éniqiki, méning shexsi bixeterlikim xitay xelq jumhuriyitining resmiy xadimlirining biwasite tehditige uchridi” dégen. Deywid panéloning bildürüshiche, u teywen tashqi ishlar ministiri joséf wu bilen bu yil 2-ayda körüshken, shundaqla uninggha eger mikronéziye teywen bilen diplomatik munasiwet qursa texminen 50 milyon dollarliq sélinmigha éhtiyajliq bolidighanliqini éytqan.