Yaponiye hökümiti xitay tehditige taqabil turush üchün 75 milyard dollar meblegh salmaqchi

Yéqinqi yillardin buyan gherb dunyasi bilen xitay otturisidiki yiriklishishning merkiziy nuqtiliridin biri hindi-tinch okyan rayoni bolup, yéqinda yaponiye bash weziri fumi'o kishida yaponiyening bu rayon'gha 75 milyard amérika dolliri meblegh salidighanliqini, buningdiki asasliq meqsedning xitay otturigha chiqiriwatqan türlük xirislargha taqabil turush ikenlikini tekitligen.

Roytérs agéntliqining 21-marttiki xewiride éytilishiche, bash wezir kishida bu sözlerni hindistan paytexti yéngi déhlidiki ziyariti jeryanida éytqan. Shuningdek yaponiye hökümitining hindi-tinch okyan rayoni heqqidiki pilanida tinchliq saqlash, hemkarliq ornitish, dunyawi birlik hasil qilish we ochuq déngiz bixeterlikige képillik qilishtek töt türlük ghol wezipe barliqini, bu wezipilerni emelge ashurush üchün 2030-yiligha qeder 75 milyard amérika dolliri meblegh salidighanliqini bildürgen. U bu heqte söz qilip: “Biz erkin we ochuq bolghan hindi-tinch okyan rayoni üchün bolidighan hemkarliqning da'irisini téximu kéngeytishni pilan qiliwatimiz. Buningda hindistan muhim shériklerdin hésablinidu” dégen.

Melum bolushiche, xitayning hindi-tinch ‍okyan rayonidiki barghanséri yuquri pellige chiqiwatqan herbiy ighwagerliki we mushtumzorluqigha taqabil turush üchün, yaponiye, hindistan, awstraliye we amérika qatarliq döletler “Töt dölet ittipaqi” ni berpa qilip chiqqan idi. Bu ittipaqning mustehkemlinishi xitayning “Bir belwagh bir yol” qurulushi namida özlirining hindi-tinch okyan rayonidiki herbiy quwwitini zor derijide ashurushi bilen mas halda éship bériwatqanliqi melum.