Хитай һөкүмити уйғурлар мәсилиси һәққидә исраилийәгә бесим қилған

Мухбиримиз әзиз
2022.08.23
Share on WhatsApp
Share on WhatsApp

“аксйос” (Axios) ториниң йеқинда әһвал игилиши җәрянида хитай һөкүмитиниң уйғурлар мәсилиси түпәйлидин рәсмий һалда исраилийәни “агаһландурмақчи” болғанлиқи мәлум болған.

Хәвәрдә ейтилишичә, хитай компартийәси мәркизий комитети ташқи алақә бөлүминиң башлиқи лю җйәнчав йеқинда исраилийәниң бейҗиңдики баш әлчиси ирит бен абба (Irit Ben-Abba) ға америка билән болған мунасивәттә “америка һөкүмитиниң бесимини дәп өзлириниң бейҗиң билән болған мунасивитини бузуп қоймаслиқ” ни агаһландурған. Шуниңдәк өзлириниңму “исраилийәдики йәһудийларға охшашла ғәрб җаһангирликиниң зиянкәшликигә учриған хәлқ икәнлики” ни әскәрткән. У бу һәқтики сөзидә “исраилийә һазир биз билән қандақ мунасивәттә болушини бәлгиләйдиған ачқучлуқ нуқтида турмақта” дегән.

Хәвәрдә ейтилишичә, лю җйәнчав исраилийә һөкүмитиниң бирләшкән дөләтләр тәшкилати (б д т) да “уйғурлар қирғинчилиққа учраватиду” дегән мәсилидә америка билән бир сәптә турғанлиқини әйиблигән. Шундақла уларни “америка башлиған патқаққа патмаслиқ” қа дәвәт қилған. У бу һәқтә қилған сөзидә “америка һазирғичә афғанистан вә ирақта уруш қозғиған болсиму һөкүмитимиз өткән 40 йилда бир пайму оқ чиқарғини йоқ” дегән. Әмма исраилийә баш әлчиси “бизниң өз алдиға мустәқил дипломатийә сияситимиз бар” дегән һәмдә нөвәттики мәйданини өзгәртмәйдиғанлиқини билдүргән.

Мәлум болушичә, исраилийә һөкүмити сабиқ баш министир бенямин нетанияху (Benjamin Netanyahu) дәвридә хитай билән бәкла йеқин мунасивәттә болған болуп, йеңи һөкүмәт дәвридә бу һал түптин өзгәргән. Болупму хитай һөкүмити ислам дунясиниң қоллишини қолға кәлтүрүш үчүн американиң әң йеқин иттипақдашлириниң бири болған исраилийә билән тиркишип келиватқан пәләстин дөлитиниң исраилийәгә қарши паалийәтлирини қоллашни давам қилдурғанлиқтин исраилийәдики хитайға қарши кәйпият барғансери юқири көтүрүлмәктикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.