Xyu xyuwit: “Amérika démokratiyesige heqiqiy tehdit xitaydur!”

Muxbirimiz eziz
2021-12-28
Share

Amérika jama'itige yaxshi tonushluq bolghan téléwiziye riyasetchisi we meshhur siyasiy analizchi xyu xyuwit (Hugh Hewitt) nöwettiki amérika démokratiyesige heqiqiy menide tehdit peyda qiliwatqan zulmetning xitaydin kéliwatqanliqini alahide tekitlep “Amérika xelqi xitaydin ibaret bu heqiqiy tehditke qarshi bir yaqidin bash chiqirishi lazim” dep körsetti.

“Washin'gton pochtisi” gézitining 27-dékabir sanida élan qilin'ghan bu heqtiki obzor maqaliside xuy xyuwit nöwette xitayning yalghuz tehditla emes, yene zor xeterningmu béshariti ikenlikini tepsiliy sherhlidi. U baydén hökümitining dölet bixeterliki chüshenchiside hélihem bir qatar kemtüklükning mewjutluqini, bolupmu wiyétnam urushi mezgilidiki tepekkur basquchida toxtap qalghan birqisim kishilerning ‍izchil kilimat mesiliside yaki qanun arqiliq idare qilish mesiliside pirqirap yürgenlikini tenqidlep “Hazir biz üchün eng zor tehdit xitaydur. Bolupmu rehimsizlikte tengdishi tépilmas shi jinping bashlap méngiwatqan xitay kompartiyesi hazir téxnika, herbiy ishlar we iqtisadiy amil nuqtisidin élip éytqanda eyni waqittiki sowét ittipaqi halak bolush harpisidiki sewiyege yéqinlap qaldi” deydu.

Aptorning qarishiche, amérika hökümiti ötmüshte sowét ittipaqini eng zor tehdit dep qarap kelgen. Buning bilen 40 yilliq “Soghuq urush” dawam qilghan. Emma ötken 25 yilda amérika izchil halda xitayning bash kötürüshini diqqettin saqit qilip kelgen bolup, ularning bu heqtiki chüshenchiside barliqqa kelgen zor özgirish xongkongdiki démokratiye namayishini basturush, Uyghurlarni qirghin qilish, gherezlik halda wirusning “Qéchip kétishi” ge yol qoyush, shuningdek teywen boghuzida herbiy ighwagerlik qilish qatarliq ishlardin kéyin andin bashlan'ghan. Téximu muhimi amérika hökümiti bixudluq qilghan hemde bar diqqitini islam ashqunluqigha atap halidin ketken bu 25 yilda xitay hökümiti rusiye we iran bilen mustehkem dostluq munasiwiti ornitip bolghan.

Aptor mushu ehwallarni omumlashturup “Emdi biz ewladlirimizgha bundaq éghir yükni qaldurup ketsek bolmaydu. Buning üchün pikir jehettiki ixtilapni bir yaqqa qayrip qoyup turup pütkül amérika xelqi bu ortaq tehditke qarshi ittipaqliq ornitishi lazim” deydu. Shuning bilen birge amérika hökümitining dölet xam chot hésabining tézdin xitaygha qarshi mudapi'e körüsh sahesige merkezlishishi lazimliqini tekitleydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet