Xitay yawropa ittipaqi bilen soda urushigha kiridighanliqidin bésharet bergen
2024.05.20
Xitay da'iriliri, eger yawropa ittipaqi xitay shirketlirige qarita tekshürüshni dawamlashtursa, uninggha qarita öch élish xaraktérlik tedbirlerni qollinidighanliqidin bésharet bergen. Bu xitayning yawropa ittipaqi bilen bolghan soda ixtilapida xuddi amérika bilen bolghandek soda urushigha kirishidighanliqidin bésharet béridighanliqini körsitidu, dep qaralmaqta.
“Blumbérg” xewer agéntliqining xewer qilishiche, xitay hökümiti yawropadin öch élish üchün qollinidighan tedbiride yawropaning yémek-ichmek, ayropilan we wino mehsulatlirini nishan qilishi mumkinliki bildürülgen. Xewerlerde, bu agahlandurush yawropa ittipaqining dölet qoshumche yardimige érishiwatqan xitay mehsulatlirigha, jümlidin xitayning tokluq aptomobil mehsulatlirigha qarita tekshürüsh élip bérishigha qaritilghanliqi qeyt qilinmaqta.
Melum bolushiche, xitay kompartiyesining bash sékrétari shi jinpingning mushu ayning bashlirida firansiyege qilghan ziyaritide, ukra'ina urushi bilen bir waqitta xitayning tokluq aptomobil mehsulati pirézidént makron bilen shi jinpingning nuqtiliq muzakire qilghan témilirining biri bolghan idi. “Blumbérg” ning xewiride, xitayning bir hökümet taratqusi “Yüyüen tentiyen” namliq ijtima'iy alaqe supisida, eger yawropa ittipaqi xitay shirketlirini tekshürüshni dawamlashtursa, xitayning buninggha qarita “Intayin qattiq öch élish tedbirlirini qollinishi mumkinliki” ni éytqan. Xewerlerde béyjingning da'im bu xil qanallar arqiliq özining soda mesilisidiki pozitsiyesini ipadileydighanliqi qeyt qilinmaqta. Xitay hökümet taratqusining uchurida, xitayning konkrét qandaq öch élish tedbiri qollinidighanliqi tilgha élinmighan bolsimu, emma bir adwokatning sözini neqil keltürüp, öch élish tedbirining süt mehsulatliri, wino we ayropilan qatarliqlarni nishan qilishi mumkinlikini ilgiri sürgen.
“Blumbérg” ning éytishiche, bu xil öch élish tedbirlirining yawropagha bolghan tesiri cheklik bolsimu, emma xitayning yawropa éksport mehsulatlirigha cheklime qoyushi bashqa sahelerge kéngishini keltürüp chiqirishi mumkin iken. Xitay ötken hepte yawropa, amérika we bashqa döletlerning ximiye mehsulatlirigha qarita soda tekshürüshi élip baridighanliqini élan qilghan. Oxshash bir waqitta yene yawropa rehberlirimu dölet qoshumche yardimige érishiwatqan xitay mehsulatlirining yawropa sana'itige xewp yetküzüwatqanliqini éytqan.