Amérika sherqiy we jenubiy déngizda xitay tehditige taqabil turush tirishchanliqini kücheytmekte

Amérika tashqi ishlar ministiri antoni bilénkin 28-iyul yekshenbe küni yaponiyede “Töt terep xewpsizlik diyalogi” (QUAD) qa eza döletlerning ministirliri bilen uchrashqan. NBC Torida bérilgen xewerde éytilishiche, amérika, awstraliye, hindistan we yaponiyedin terkib tapqan bu eza döletlerning tashqi ishlar ministirliri nuqtiliq halda xitayning sherqiy we jenubiy déngizdiki xeterlik herbiy manéwirliri we heriketlirini muzakire qilghan hemde déngiz mudapi'esi hemkarliqini chongqurlashturushqa wede qilishqan.

Shu küni yene, amérika bilen yaponiyening tashqi ishlar ministirliri we dölet mudapi'e ministirliri xewpsizlik söhbiti ötküzgen bolup, söhbettin kéyinki birleshme bayanatta xitayni “Rayon duch kelgen eng chong istratégiyelik reqib” dep jakarlighan.

Bayanatta yene mundaq déyilgen: “Biz sherqiy we jenubiy déngizning weziyitige estayidil mu'amile qilimiz. Biz bu rayonlarning hazirqi halitini zorluq yaki mejburlash wasitisi arqiliq özgertmekchi bolghan bir tereplime heriketke küchlük qarshi turimiz”.

“Wal sitrit zhurnili” ning bu heqtiki xewiridin melum bolushiche, amérika bilen yaponiye, yaponiyede yéngi bir herbiy qomandanliq merkizi qurup, bixeterlik alaqisini kücheytish heqqide kélishken. Bu qomandanliq merkizi yaponiye terep bilen herbiy heriketni maslashturush, birleshme manéwirni pilanlash, eger urush partlighan teqdirde döletni qoghdashtek mes'uliyetlerni üstige alidiken.