Хитай хәлқара еғирлиқ көтүрүш мусабиқисигә қатнишиштин бир йил чәкләнди

Мухбиримиз әркин
2017-10-02
Share

Хәлқара еғирлиқ көтүрүш федератсийәси дүшәнбә күни хитайниң хәлқара еғирлиқ көтүрүш мусабиқисигә қатнишишиниң бир йил чәкләнгәнликини елан қилған.

Б б с ниң хәвәр қилишичә, хәлқара олимпик комитети йеңи техникилиқ усулларни қоллинип, 2008- вә 2012‏-йиллиридики хәлқара олимпик мусабиқисидин қалған бәдән тәкшүрүш әвришкилирини қайта анализ қилған. Анализ нәтиҗисидә сав лей, чен шйешя, лю чүнхоң қатарлиқ 3 нәпәр хитай еғирлиқ көтүрүш тәнһәрикәтчисиниң бейҗиң олимпик мусабиқисидә роһландуруш дориси ишләткәнлики мәлум болған.

Юқириқи 3 нәпәр хитай тәнһәрикәтчи 2008‏-йилдики бейҗиң олимпик мусабиқисидә алтун медалға еришкән. Хәлқара еғирлиқ көтүрүш федератсийәси бу йилниң башлирида уларниң алтун медалини қайтурувелиши мумкинликини билдүргән иди. Б б с ниң хәвиридә көрситишичә, хәлқара еғирлиқ көтүрүш федератсийәси хитайдин башқа йәнә русийә, украинйә, әзәрбәйҗан, беларусийә, қазақистан, әрменийә вә түркийә қатарлиқ дөләтләрниму хәлқара мусабиқигә қатнишиштин бир йил мәни қилған.

Хәлқара олимпик комитети бу дөләтләрниң еғирлиқ көтүрүш тәнһәрикәтчилириниңму роһландуруш дориси ишләткәнликини байқиған. Хәлқара еғирлиқ көтүрүш федератсийәси 2016‏-йили әгәр һәрқандақ дөләттин 3 яки униңдин артуқ тәнһәрикәтчиниң роһландуруш дориси ишләткәнлики байқалса, бу дөләтниң мусабиқидин бир йил мәни қилинидиғанлиқини билдүргән.

Мәзкур органниң қәйт қилишичә, хитайни өз ичигә алған юқириқи 9 дөләт бу йил ноябирда американиң калифорнийә штатида өткүзүлидиған дуня еғирлиқ көтүрүш чемпийонлуқ талишиш мусабиқисигә қатнаштурулмайдикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт