Xitay emeldari xelq'ara hemkarliqni kücheytip “Térrorluqning menbesi” ni qurutushni telep qildi

Xitayning bixeterlik ishlirigha mes'ul yuqiri derijilik bir emeldari 26‏-aprél küni xelq'ara hemkarliqni kücheytip “Térrorluqning menbesi” ni yoqitishni telep qilghan. Bu sözlerni xitay dölet ishliri komissari, xitay jama'et xewpsizlik ministiri jaw kéji ötken jüme küni chaqirilghan bir qétimliq téléfon yighinida tekitligen. Shinxu'a agéntliqining xewiride bayan qilinishiche, yighinda jaw kéji istixbarat toplashni kücheytish we singip kirishke qarshi téximu keskin tedbirlerni élishning zörirlikini ilgiri sürgen.

Xewerde jaw kéjining istixbarat toplash we singip kirishke qarshi konkrét qandaq tedbirlerni élishni telep qilghanliqi tilgha élinmighan bolsimu, biraq u “Mesilining yiltizini hel qilidighan tedbirlerni élish we térrorluqqa qarshi turush xizmitini kücheytish zörür,” dégen. Xewerde yene jaw kéjining “Térrorluqqa qarshi xelq'araliq hemkarliqni kücheytip, térrorluqning ozuqlinish menbesini weyran qilish” ni telep qilghanliqini bildürgen.

Közetküchilerning ilgiri sürüshiche, jaw kéjining xitay hökümiti Uyghurlarning diniy étiqad, medeniyet, til, örp- adet we turmush usullirini esebilikning menbesi dep qarap qattiq cheklewatqan, az dégende bir milyondek Uyghurni yighiwélish lagérlirigha qamiwalghan, Uyghurlarni omumyüzlük qamal astigha alghan bir mezglde bu sözlerni qilishi diqqet qozghaydiken. Xitay hökümitining “Térrorluq” qa, “Ashqunluq” qa qarshi namda yolgha qoyghan yuqiriqi tedbirliri yéqindin béri xelq'ara jem'iyetning diqqitini qozghashqa bashlighan. Yéqinda amérikining b d t da turushluq diplomatliri xitayning térrorluqini bahane qilip, Uyghurlarni basturuwatqanliqi, yighiwélish lagérlirini qurup, yüz minglighan Uyghurni qamighanliqini qattiq tenqid qilghan idi.