Хитайниң министир дәриҗилик 4 оргини бирликтә «террорлуққа қарши қолланма» түзүп чиққан

Мухбиримиз шөһрәт һошур
2018-06-20
Елхәт
Пикир
Share
Принт

Йеқинда хитай мәмликәтлик тәптиш мәһкимиси, хитай мәмликәтлик алий сот мәһкимиси, хитай әдлийә министирлики вә хитай җ х министирлиқи бирликтә «террорлуқ» қа ятидиған җинайәтләрниң җазаси вә қануний тәртипи һәққидә бир қолланма түзүп чиққан.

Хитайда чиқидиған «йәр шари вақти гезити» ниң бүгүнки инглизчә санида хәвәр қилинишичә, бу қолланмида «террорлуқ» қа ятидиған мәзмундики материялларни торда язған, оқуған вә тарқатқанларниң җинайи җавабкарлиққа тартилидиғанлиқи билдүргән.

Бу қолланма өткән җүмә күни хитай мәмликәтлик тәптиш мәһкимисиниң тор бетидә елан қилинған. «Йәр шари вақти гезити» дә бу тоғрулуқ пикир баян қилған хитай мәркизи милләтләр университетиниң мутәхәссиси шйоң күншин «террорлуқ» қа ятидиған мәзмундики материялларниң торларда барғансери көзгә көп челиқидиған болуп кетиватқанлиқини әскәрткән.

У мәзкур қолланминиң «террорлуқ» хаһишидики кишиләрни, йәни «террорлуққа қарши қанун» ға хилаплиқ қилиш еһтимали бар кишиләрни байқап бекитиш үчүн түзүп чиқилғанлиқини баян қилған.

Уйғур диярида алдинқи йилларда «диний әсәбийликниң 75 хил аламити» қатарлиқ қолланмилар тарқитилған вә өткән йили «террорлуққа қарши қанун» му мақулланған иди. Хитайниң бу қетим министир дәриҗилик 4 оргини түзүп чиққан мәзкур «террорлуққа қарши қолланма» ниң алдинқилиридин қандақ бир пәрққә игә икәнлики мәзкур хәвәрдә тилға елинмиған.

Йиллардин бери мустәқил хәлқара ахбарат васитилири хитай даирилириниң уйғур диярида аталмиш «террорлуқ» қа қарши турушта қанунға асасланмай һөҗҗәткә асаслиниватқанлиқи, әркинлик үчүн күрәш қиливатқанларни «террорлуқ» билән әйибләватқанлиқи әскәртип кәлгән иди.

Шуниң билән бир вақитта хәлқара таратқулар хитайниң «террорлуқ» билән әйибләнгүчиләрни җазалапла қалмастин, бәлки уйғур миллитини пүтүн бир милләт гәвдиси билән җазалаватқанлиқи һәққидә көплигән хәвәр вә мақалиләрни елан қилип кәлгән иди.

Пикирләр (0)
Share
Толуқ бәт