Xitayning ministir derijilik 4 orgini birlikte "Térrorluqqa qarshi qollanma" tüzüp chiqqan

Muxbirimiz shöhret hoshur
2018-06-20

Yéqinda xitay memliketlik teptish mehkimisi, xitay memliketlik aliy sot mehkimisi, xitay edliye ministirliki we xitay j x ministirliqi birlikte "Térrorluq" qa yatidighan jinayetlerning jazasi we qanuniy tertipi heqqide bir qollanma tüzüp chiqqan.

Xitayda chiqidighan "Yer shari waqti géziti" ning bügünki in'glizche sanida xewer qilinishiche, bu qollanmida "Térrorluq" qa yatidighan mezmundiki matériyallarni torda yazghan, oqughan we tarqatqanlarning jinayi jawabkarliqqa tartilidighanliqi bildürgen.

Bu qollanma ötken jüme küni xitay memliketlik teptish mehkimisining tor bétide élan qilin'ghan. "Yer shari waqti géziti" de bu toghruluq pikir bayan qilghan xitay merkizi milletler uniwérsitétining mutexessisi shyong künshin "Térrorluq" qa yatidighan mezmundiki matériyallarning torlarda barghanséri közge köp chéliqidighan bolup kétiwatqanliqini eskertken.

U mezkur qollanmining "Térrorluq" xahishidiki kishilerni, yeni "Térrorluqqa qarshi qanun" gha xilapliq qilish éhtimali bar kishilerni bayqap békitish üchün tüzüp chiqilghanliqini bayan qilghan.

Uyghur diyarida aldinqi yillarda "Diniy esebiylikning 75 xil alamiti" qatarliq qollanmilar tarqitilghan we ötken yili "Térrorluqqa qarshi qanun" mu maqullan'ghan idi. Xitayning bu qétim ministir derijilik 4 orgini tüzüp chiqqan mezkur "Térrorluqqa qarshi qollanma" ning aldinqiliridin qandaq bir perqqe ige ikenliki mezkur xewerde tilgha élinmighan.

Yillardin béri musteqil xelq'ara axbarat wasitiliri xitay da'irilirining Uyghur diyarida atalmish "Térrorluq" qa qarshi turushta qanun'gha asaslanmay höjjetke asasliniwatqanliqi, erkinlik üchün küresh qiliwatqanlarni "Térrorluq" bilen eyiblewatqanliqi eskertip kelgen idi.

Shuning bilen bir waqitta xelq'ara taratqular xitayning "Térrorluq" bilen eyiblen'güchilerni jazalapla qalmastin, belki Uyghur millitini pütün bir millet gewdisi bilen jazalawatqanliqi heqqide köpligen xewer we maqalilerni élan qilip kelgen idi.