Kanada hökümiti xitayning eng chong bankasigha “Térorluqqa qarshi turush qanuni” boyiche jerimane qoyghan

Muxbirimiz erkin
2021.12.27

Kanada hökümitining xitayning dölet igidarchiliqidiki eng chong bankasi bolghan xitay soda-sana'et bankasigha “Jinayi ishlar we térorchilarni pul bilen teminleshke qarshi turush qanuni” gha asasen, 701 ming 250 dollar jerimane qoyghan. Gerche jerimane sommisi köp bolmisimu, biraq bu tunji qétim dölet igidarchiliqidiki bir xitay pul-mu'amile organining chet el térorluqqa qarshi turush qanunigha asasen jazalinishidur. Kanadadiki “Torontu quyashi” gézitining ashkarlishiche, xitay soda-sana'et bankasi gumanliq banka hésab nomurini melum qilmighanliqi üchün jerimane tölesh jazasigha uchrighan.

Kanada maliye périwuti we melumat analiz merkizining ijra'iye dériktori sarah paku'ét: “Biz qet'iy bolimiz. Ular éhtiyajliq bolghanda muwapiq heriket qollinimiz,” dégen. Kanada qanunida pul-mu'amile organlirining 10 ming dollar yaki uningdin artuq bolghan herqandaq pul périwutini “Maliye périwuti we melumat analiz merkizi” ge melum qilish mejburiyiti bar iken.

“Torontu quyashi” gézitining éytishiche, xitay soda-sana'et bankasi “Gumanliq pul périwutini melum qilmay, sodida pul yuyush yaki térorluqni meblegh bilen teminlesh jinayiti sadir qilish gumani peyda qilishqa yéterlik asas hazirlap bergen,” iken

Xitay soda-sana'et bankasi ‍özining herkitining “Resmiyet qeghizi béjirish jeryanidiki sewenlik” ikenlikini ilgiri sürüp, “Qanun'gha xilapliq qilghanliqigha da'ir héchqandaq delil yoqliqi” ni bildürgen bolsimu, biraq jerimanini töligen. Melum bolushiche, xitay soda-sana'‍et bankasining kanadadiki wankowér, richmond, british kolumbiyesi, kalgari, toronto, richmond hil, markham, missisa'uga, skarboro, montériyal qatarliq sheherliride shöbisi bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.