Xitay hökümitining béyjingdiki héytliq ziyapiti “Shinjang teshwiqati” pa'aliyitige aylan'ghan

Washin'gtondin muxbirimiz jewlan teyyarlidi
2024.04.10

4-Ayning 10-küni Uyghur aptonom rayonluq hökümet béyjingda héytliq ziyapet bérip, xitayda turushluq elchixanilar ara söhbet-uchrishish pa'aliyiti ötküzgen.

Xitayning “Shinjang géziti”, “Tengritagh tori” chiqarghan xewerge qarighanda, bu ziyapetke 49 döletning xitayda turushluq elchixaniliridin 21 bash elchi we 50 nechche diplomat qatnashqan bolup, Uyghur aptonom rayonluq partkom sékrétari ma shingruy, hökümet re'isi erkin tunyaz qatarliqlarmu ishtirak qilghan.

Atalmish “Shinjang” hökümitining bu pa'aliyetni béyjingda orunlashturushtiki meqsiti musulman döletlirining diplomatlirini “Shinjangning tereqqiyat ehwalidin, kishilik hoquqqa kapaletlik qilish muweppeqiyetliridin xewerdar qilish” bolup, pa'aliyette aldi bilen xitayning teshwiqat bölümi ishligen “Échiwétilgen shinjang” namliq qisqa filim körsitilgen. Arqidin erkin tunyaz Uyghur rayonining ehwali heqqide doklat bergen, andin xitay tashqi ishlar ministirliqining mu'awin ministiri chén shyawdung sözge chiqip, “Shi jinpingning shinjanggha alahide köngül bölidighanliqini, shinjangdiki tereqqiyatning yaxshi boluwatqanliqini, emma bezilerning buni körelmey, yalghan-yawidaqlarni tarqitip, shinjangning muqimliqi we tereqqiyatigha buzghunchiliq qiliwatqanliqini, bu yalghanni pash qilish we emeliyetni körüshning muhimliqini, buning üchün shinjang hékayilirini sözlep, güzel shinjang teshwiqatini kücheytishning zörürlükini” tekitligen.

Buning aldida, xitay da'iriliri 9-aprél küni 21 dölettin kelgen 26 taratquning mes'ullirini ürümchige toplap, “Yipek yoli iqtisad belbéghini qurghuchi döletler taratqu mes'ulliri muhakime yighini” achqan bolsa, 27-mart küni ma shingruy ürümchide bir qisim ereb döletlirining “Siyasiy partiye wekilliri tekshürüsh ömiki” ni kütüwélip, ularni “Tinch-inaq, hayatiy küchke tolghan güzel shinjang hékayisini sözlep bérish” ke righbetlendürgenidi. Xitay hökümitining chet ellerge, bolupmu musulman ellirige qaratqan, arqa-arqidin élip bériwatqan bu diplomatik teshwiqat pa'aliyetliri xitay hökümitining Uyghurlargha élip bériwatqan diniy ziyankeshlikini yalghan'gha chiqirish we musulmanlar dunyasini téximu bixudlashturush taktikisi dep qaralmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.