Хитай һөкүмити йәнә бир қетим чәтәлләрдики ‍уйғурларни қарилиди

Мухбиримиз әзиз
2020-06-02
Share

Хитай һөкүмитиниң канийи болған “йәр шари вақти гезити” арқиму арқидин икки парчә баш мақалә елан қилип, чәтәлләрдики ‍уйғурларни “ялған хәвәр тарқатмақта,” дәп әйиблиди.

1-Июн күнидики мақалисидә хитай һөкүмити “тәрбийәләш мәркәзлири” дики “курсантлар” ниң пүтүнләй җәмийәт қойниға қайтип кәлгәнликини тәкитләп: “бу мәркәзләрдә бирму адәм қалмиған турса қандақсиға таҗсиман вируси тарқилишниң хейим-хәтири мәвҗут болсун?” дәп соал қойған. Сәһийә назаритиниң назири мутәллип рози бу һәқтә мухбирларниң соаллириға җаваб бәргәндә юқириқи сөзни қилған. Шундақла буларниң чәтәлләрдики “шәрқий түркистанчи дүшмән күчләр” ниң дуняни вирус қаплиған бир пәйтни ғәниймәт билип хитайға қарши күчләр билән бирлишип ойнаватқан ‍оюни икәнликини, бу җайларда вирус юқуштин әнсирәйдиған бирму тутқунниң йоқ икәнликини тәкитлигән.

Мәзкур гезитниң 2-июндики мақалисидә болса “чәтәлләрдики шәрқий түркистанчи дүшмән күчләр дөлитимизниң инақ вә еҗил милләтләр мунасивитини бузуш үчүн рамазан чәклимиси һәққидики бир қатар ялғанларни тоқуп чиққан,” дейилгән. Мақалида дуня уйғур қурултийиниң бу һәқтики баянатлири вә қисқа видийолирини буниңға мисал қилип, “шинҗаңда һәр милләт хәлқиниң динға етиқад қилиш яки қилмаслиқ һоқуқи бар. Кишиләрниң диний етиқадиға һечқандақ чәклимә қоюлмайду,” дегән.

Һалбуки, хитай һөкүмитиниң өзлири тарқатқан видейолуқ хәвәрләрдә уйғурларниң чоң-кичик болушидин қәтийнәзәр, һәтта баш кийим кийгүдәк һәқлириниңму қалмиғанлиқи ашкара мәлум болуп келиватқанлиқи мәлум. Радийомизниң бу һәқтики әһвал игилиши җәрянидиму һазир уйғурларниң рамазан тутуш әмәс, бу һәқтә сөз қилишқиму җүрәт қилалмайдиған һалда икәнлики көп қетим ашкара болған. Анализчилар бу һәқтә пикир қилип: “хитай һөкүмити мушу тәриқидә ‛ялғанни үч қетим тәкрарлиса һәқиқәткә айлиниду‚ дегәнни синақ қиливатиду. Әмма бу хилдики ялғанлар һәқиқәткә айланмайду,” дәп көрсәтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт