Xitay hökümiti yene bir qétim chet'ellerdiki ‍Uyghurlarni qarilidi

Muxbirimiz eziz
2020-06-02
Élxet
Pikir
Share
Print

Xitay hökümitining kaniyi bolghan "Yer shari waqti géziti" arqimu arqidin ikki parche bash maqale élan qilip, chet'ellerdiki ‍Uyghurlarni "Yalghan xewer tarqatmaqta," dep eyiblidi.

1-Iyun künidiki maqaliside xitay hökümiti "Terbiyelesh merkezliri" diki "Kursantlar" ning pütünley jem'iyet qoynigha qaytip kelgenlikini tekitlep: "Bu merkezlerde birmu adem qalmighan tursa qandaqsigha tajsiman wirusi tarqilishning xéyim-xetiri mewjut bolsun?" dep so'al qoyghan. Sehiye nazaritining naziri mutellip rozi bu heqte muxbirlarning so'allirigha jawab bergende yuqiriqi sözni qilghan. Shundaqla bularning chet'ellerdiki "Sherqiy türkistanchi düshmen küchler" ning dunyani wirus qaplighan bir peytni gheniymet bilip xitaygha qarshi küchler bilen birliship oynawatqan ‍oyuni ikenlikini, bu jaylarda wirus yuqushtin ensireydighan birmu tutqunning yoq ikenlikini tekitligen.

Mezkur gézitning 2-iyundiki maqaliside bolsa "Chet'ellerdiki sherqiy türkistanchi düshmen küchler dölitimizning inaq we éjil milletler munasiwitini buzush üchün ramazan cheklimisi heqqidiki bir qatar yalghanlarni toqup chiqqan," déyilgen. Maqalida dunya Uyghur qurultiyining bu heqtiki bayanatliri we qisqa widiyolirini buninggha misal qilip, "Shinjangda her millet xelqining din'gha étiqad qilish yaki qilmasliq hoquqi bar. Kishilerning diniy étiqadigha héchqandaq cheklime qoyulmaydu," dégen.

Halbuki, xitay hökümitining özliri tarqatqan widéyoluq xewerlerde Uyghurlarning chong-kichik bolushidin qet'iynezer, hetta bash kiyim kiygüdek heqliriningmu qalmighanliqi ashkara melum bolup kéliwatqanliqi melum. Radiyomizning bu heqtiki ehwal igilishi jeryanidimu hazir Uyghurlarning ramazan tutush emes, bu heqte söz qilishqimu jür'et qilalmaydighan halda ikenliki köp qétim ashkara bolghan. Analizchilar bu heqte pikir qilip: "Xitay hökümiti mushu teriqide 'yalghanni üch qétim tekrarlisa heqiqetke aylinidu' dégenni sinaq qiliwatidu. Emma bu xildiki yalghanlar heqiqetke aylanmaydu," dep körsetti.

Toluq bet