Xitay wekiller ömiki malayshiya ziyaritide Uyghur diyaridiki siyasetlirini aqlidi

Muxbirimiz eziz
2019-06-20
Élxet
Pikir
Share
Print

Islam dunyasi Uyghurlar diyaridiki siyasiy basturush heriketliri we zor tutqun mesilisige izchil süküt qiliwatqanda malayshiya hökümiti izchil halda Uyghurlar mesilisini mu'eyyen derijide tekitlep kelgen idi. Yéqinda xitay hökümiti alayiten wekiller ömiki teshkillep malayshiyagha ewetti hemde özlirining Uyghurlar diyarida "Térrorluq we esebiylik amillirini yoqitish, shundaqla namratliqni chörüp tashlash" qa yardem bérish üchün bir qatar tedbirlerni yolgha qoyghanliqi heqqide chüshenche berdi.

Malayshiyada chiqidighan "Cholpan" gézitining 20-iyundiki sanigha bésilghan bu heqtiki xewerde éytilishiche, xitay merkiziy birliksep bölümining mu'awin mudiri jang beyching bashchiliqidiki bu ömek "Hökümitimiz her yili shinjanggha 400 milyard yüen meblegh salidu. Biz mushu arqiliq shinjangdiki 19 sheherning tereqqiyatini qollawatimiz" dégen. Halbuki, alaqidar matériyallar xitay hökümitining Uyghurlar diyarigha salghan ghayet zor sandiki meblighining mahiyette yuqiri pen-téxnikiliq nazaret we Uyghurlarni nishan qilghan basturushqa serp boluwatqanliqini körsitidu. 

Mezkur ömek malayshiyada xitay hökümitining Uyghurlar diyarini "Tereqqiy qildurush" üchün qandaq jan pidaliq qiliwatqanliqi, gherb dunyasidiki bir qatar saxta uchurlarning kishilerni qaymuqturush üchün otturigha chiqqanliqi heqqidimu köplep chüshenche bergen.

Melum bolushiche, bu ömek terkibidiki birdin-bir Uyghur shinjang islam institutining mektep mudiri, muhajirettiki Uyghurlar birdek "Xitay hökümitining ghalchisi" dep eyiblewatqan abduréqip tömürniyaz iken. U ziyaret jeryanida "Dölitimizning iqtisadiy jehettin yüksiliwatqanliqigha heset otliri qaynap tashqan bir türküm ichi yaman döletler shinjang heqqide bir patman yalghan-yawidaqlarni tarqatmaqta," dégen. Shuningdek xitay hökümitining diniy étiqad erkinlikige tengdashsiz derijide hörmet qiliwatqanliqini, minglighan meschitler we islam institutlirining échiliwatqanliqini aghzi-aghzigha tegmey maxtighan. 

Melum bolushiche, xelq'ara kishilik hoquq teshkilatliri we herqaysi hökümetlerning ishenchlik melumatlirida Uyghurlar diyari izchil halda "Yer sharidiki eng chong saqchi döliti" dep teswirlinip kelmekte iken.

Toluq bet