Уйғур районида хитай коммунистлириниң тәшвиқати юқири пәллигә чиққан

Мухбиримиз җәвлан
2021-06-23
Share

Хитай компартийәси қурулғанлиқиниң 100 йиллиқини хатириләш уйғур районидиму әвҗ алған болуп, һөкүмәт әмәлдарлиридин тартип авам пуқрағичә "партийәгә қәсәм бериш, партийәни күйләш, партийәгә рәһмәт ейтиш, партийәгә мәңгү әгишиш" паалийәтлири җанлинип кәткән.

Хитай таратқулириниң хәвәр қилишичә, 6-айниң 22-күни шинҗаң уйғур райони парткомниң секритари чен чүәнго, муавин секритари шөһрәт закир вә биңтуән әмәлдарлири "8-армийәниң шинҗаңда турушлуқ иш беҗириш орни хатирә сарийи" да зиярәт вә өгиништә болған һәмдә йеңи партийәгә киргәнләр билән бирликтә қәсәм берип, "партийә роһи" ни қайта урғутқан. Чен чүәнго йәнә йеңи партийә әзалири вәкиллирини қобул қилип, ши җинпиңниң "йеңи дәвр хитай сотсиялизми идийәси" билән қораллинип, хитай компартийәсиниң шинҗаң сияситини қәтий изчиллаштуруши үчүн төһпә қошушиға илһам бәргән.

Униңдин башқа, уйғур районида йәнә "вәтәнпәрәвәрлик тәрбийәсидә нәмунилик бәш орун" баһалинип чиққан болуп, улар хитай ишчи-деһқан 4-қизил армийәсиниң шинҗаңға кириш хатирә сарийи, мав земин (мав зедуңниң иниси) хатирә өйи, қарамай музейи, қурбан тулум хатирә сарийи, вуҗя чү шәһири һәрбийләр боз йәр өзләштүрүш музейи қатарлиқлар икән.

Көзәткүчиләрниң билдүрүшичә, хитай компартийәси өзиниң тәшвиқат хизмитигә әзәлдин әһмийәт берип кәлгән болуп, аталмиш "партийә мәдәнийити" униң ядролуқ қисми һесаблиниду. Ши җинпиң тәхткә чиққандин башлап хитай коммунистлириниң уйғур районидики тәшвиқат паалийити кәң-көләмлик вә зораванлиқ билән елип берилди. Чен чүәнго қатарлиқларниң бу қетимлиқ қәсәм бериши коммунист хитайниң бу районда еғир бесимға учраватқанлиқини, қанчә бесимға учриғанчә "адаққичә күрәш қилиш" қәсәмлирини шунчә үнлүк вақирайдиғанлиқини көрситип бериду. Хитайниң "вәтәнпәрвәрлик тәрбийәси" елип баридиған нәмунилик орунлири асасән дегүдәк коммунист хитайниң ишғалийәт тарихини хатириләш арқилиқ, өз һакимийитини мустәһкәмләшни мәқсәт қилған орунлар һесаблиниду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт